Skip to main content

IA qallunaat aningaasanut inatsisaannut piumasaqaatinik piariigaqartut

SU-nut tunngatillugu aaqqiissut, politiit atortut pitsaanerit aamma kalaallinut atugarliortunut ikiunerunissaq oqaluuserineqassapput

SU-mut tunngatillugu aaqqiissut nutaaq, politiinut attaveqarnermut atortut pitsaanerusut aamma kalaallinut Danmarkimiittunut atugarliortunut ikiueqqinneq.

Folketingimi maanna aningaasanut inatsimmik isumaqatiginninniartoqarneranut atatillugu IA-p pingaarnertut piumasaqaataat taama isikkoqarput.

SU qitiusoq
Inuit Ataqatigiit SU pillugu apeqqut qitiunerpaatut isigaa, Ventrep naalakkersuisoqatigiissitaasa ilinniarnermusiaqarneq aaqqissuuteqqinneqarnissaa aarlerisaarutigimmassuk, tapiissut annikillisinneqassasoq, ilinniartullu atornerusalissasut. Taamatut aaqqissuusseqqinnerup kalaallit Danmarkimi ilinniartut aamma eqqussavai.

- Pingaarnerpaapput kalaallinut ilinniagaqartunut tunngasut, amerlasuut Danmarkimi ilinniagaqarnerminni taamaatiinannginnissaat anguniarlugu naalakkersuisut peqatigalugit aaqqiissutissanik nassaartariaqarpugut, Aaja Chemnitz Larsen KNR-imut oqarpoq.

Siullermeertut
Inuit Ataqatigiit aatsaat siullermeerlutik aningaasnut inatsimmut siunnersuummut tunngatillugu aningaasaqarnermut ministerimik ataatsimeeqateqarput.

Ukiumoortumik anigaasaqarnermut ministerimik “avitseqateqartarnerit” aningaasanut inasisissaq pillugu aallarniutaasumik oqaloqatigiinnertut pisarput, naalakkersuisut Folketingimilu partiit tamarmiusut akornanni.

Nuannaartoq
- Nuannaarutigaara maanna folketingimi ilaasortat nunatsinneersut aningaasanut inatsisissamut isumaqatigiinniarnernut qaaqquneqarmata, taamaalillutillu namminneerlutik nunatta soqutisai oqariartuutigisinnaallugit – siornatigut periusaasimasutut qallunaat partiivi aqqutigeqqaanngikkaluarlugit.

- Uagut suliassaraarput suliassaqarfiit 32-t, suli nunarput sinnerlugu Danmarkimit ingerlanneqartut, isumannaallisaaviginiassallutigit, ilaatigut Eqqartuussiveqarnermut, Nunanut Allanut Illersornissaqarnermullu tunngasut ingerlaavartumik ineriartortinneqarnissaat nutaanngorsaavigineqarnissaallu. Tamakku saniatigut akisussaaffitsinnut ilaapput kalaallit Danmarkimi najugallit, soorlu ilinniartuutivut aammalu inuuniarnermikkut atugarliuutillit, Aaja Chemnitz Larsen tusagassiuutinut nalunaarummi erseqqissaavoq.

Sinniisoqarneq
Piumasaqaatit siulliit pingasut saniatigut, issittumi sinniisoqarnikkut issittumilu suleqatigiinnikkut nukittorsaanissamut aningaasaliinissaq, ungasinnerusoq eqqarsaatigalugu ataatsimoorussamik Issittumi Aningaasaliisarfissamik aammalu Kalaallit Nunaanni Issittumi Ilisimatusarnerup Illuanik pilersitsinissanik kissaateqartoqarpoq.

Marlunngornermi Folketingip inersuaani aningaasanut inatsisissatut siunnersuut siullermeerlugu oqaluuserineqassaaq. Aningaasanut inatsisissaq pillugu politikkikkut isumaqatigiinniarnerit oktoberimi ingerlanneqalissapput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER