kommunalvalg 2017
IA Qaasuitsoq Avannarlermi illuatungiliuttunngorpoq
Kommunimi avannarpasinnerpaami inissititsinermut isumaqatiginninniarnernit Inuit Ataqatigiit anipputa
Inuit Ataqatigiit Qaasuitsoq Avannarlermi ukiuni sisamani tulliuttuni illuatungiliuttutut inissisimassapput.
Partiip siuttutut sassarsitaa Bendt B. Kristiansen tusagassiuutinut nalunaarummi allappoq.
- Piffissami kingullermi Siumut kaffisoqatigalugit marloriarluta ataatsimeeqatigigaagut, oqaloqatigiinnermilu politikkikkut imarisaat isumaqatigiissutigineqartorujussuupput. Siumukkulli Inuit Ataqatigiit peqatiginagit suleqatigiinnissamik toqqaasimasut kingorna paasivarput, Bendt. B Kristiansen allappoq.
- Inuit Ataqatigiit ippassaq kingullertut misiliilluni Siumumut saaffiginnipput, suleqatigiinnissamullu ammalluta nalunaarutigaarput, taanna ullaaq manna kingusinnerpaamik akissuteqarfiginissaanut periarfissinneqarput.
Inuit Ataqatigiilli akissuteqarfigineqanngillat, taamaalillutillu Qaasuitsoq Avannarlermi illuatungiliuttuunissaminnut aalajangerput.