Kukkunersiuisut misissuinerat
IA: Politikerit pingasut uku landskarsimut akiligassaqarput
Inuit Ataqatigiit ilaatigut isumaqarput Kuupik Kleistip namminersorlutik oqartussanut akiligassani piaarnerpaamik akilissagai. Akiligassalli taakkua Deloitte-p kukkunersiuisutut misissuinerani kukkunermik tunngaveqarput, Kuupik Kleist oqarpoq
Decembarip 30-anni saqqummiunneqartutut Deloitte-p Naalakkersuisunut ilaasortaasimasunik misissuinerata takutippaa, piffissami 2009-miit 2014-imut Naalakkersuisunut ilaasortaasimasut arfineq-marluk landskarsi namminneq kassekredit-imittut atortarsimagaat.
Misissuineq, ilisimaneqartutut novembarip 28-anni Inatsisartunut qinersereernissap tungaanut Grønlandsbankimi bankboksimut toqqorneqartoq novembarillu 7-anni Deloitte-mit tunniunneqareersimasoq, pissutigalugu Inuit Ataqatigiit politikerit pineqartut pingasut kaammattorpaat landskarsimut akiligassatik akileqqullugit. Partiip piumasaraa:
Aleqa Hammond-ip Paris-mi Islandimilu feriarsimanermut aningaasartuutit Namminersorlutik Oqartussat akilersimasaat, akilissagai.
Kuupik Kleist-p akiligassani piaarnerpaamik akilissagai.
Anthon Frederiksen akililiukkallarneqarsimanini akilissagai.
– Oqaatigissavarput Atassummeersoq Steen Lynge Naalakkersuisutut ingerlaqqissimagaluaruni, tatiginninnginnermik taasitsiffigineqarsimassagaluartoq. Nunatta aningaasataanik akuerineqangitsunik atuisimasutut, Inatsisartut kukkunersiuinermut ataatsimiititaliaani Inuit Ataqatigiinnit ilaasortaq Agathe Fontain nalunaarpoq.
Ataasiakkaat akisussaatinneqassaput
– Tatiginnissinnaaneq pillugu suliaq una nammaasineqartariaqarpoq, ilinniarfigalugu, mississuisarneq annertusarlugu, inuillu ataasiakkat akisussaaffimmik naammassinninngitsut akisussaatittarlugit. Politikerit pillugit, Nunatta aningaasaatai pillugit, inuiaqatigiinnullu ataqqinninneq pillugu., Agathe Fontain erseqqissaavoq, taassumalu Inuit Ataqatigiit sinneri peqatigalugit nuannaarutigaa nalunaarusiaq kiisami saqqummiunneqarmat, qilanaaralugulu Kukkunersiuinermut Ataatsimiititaliap kissaatigisimasaatut Naalakkersuisut nalunaarusiamut oqaaseqaateqarnissaat.
Deloitte-p misissuineranit tamanut saqqummiunneqartumi takuneqarsinnaavoq, Kuupik Kleistip akiigassai eqqaassanngikkaanni, Aleqa Hammondip, Ane Hansenip, Anthon Frederiksenip, Mimi Karlsenip, Ove Karl Berthelsenip Steen Lyngellu akiligassatik tamaasa akilersimavaat.
– Misissuinermi inerniliineq, tassa uanga aningaasanik akiligassaqartunga, akuerinngilara. Maannangaaq annertunerusumik oqaaseqarsinnaanngilanga, Kuupik Kleist Sermitsiaq.AG-mut oqarpoq, qinnuigigatsinni Deloittep misissuinera novembarip 7-anneersoq naapertorlugu, landskarsimut akiligassai 20.288 koruunit, 2011-miit 2012-imut pilersimasut, oqaaseqarfigeqqullugit.