IA piumasaqarpoq: Perorsaasut atugaat pitsanngorlik

Isumaqatiginninniarnerit taama ittut nalinginnaasumik akuleruffigisanngikkaluarlugit, perorsaasut sulinerminni atugaasa pitsanngoriaateqarnissaat anguniarlugu, IA-p siulittaasua Múte B. Egede maanna oqaaseqarpoq.

Perorsaasut sulinerminni atugaat pillugit isumaqatiginninniarnerit maanna uninngatinneqarallarput, Namminersorlutik Oqartussat pitsannguutissatut naaperiutitut siunnersuutaat perorsaasut kattuffiata, NPK-p maanna isumaliutigimmagit.

NPK-p siulittaasuata Juliane H. Tobiassenip Sermitsiaq.AG-mut oqaatigereerpaa isumaqatigiinniartut imminnut ungasingaatsiartut.

Inuit Ataqatigiit siulittaasua naapertorlugu isumaqatigiinniarnerit taava unittuuissimapput:

- Maannali perorsaasut tungaanniit saqqummerpoq Namminersorlutik Oqartussanik isumaqatigiinniarnerit unittuuissimasut. Taamaattoqarsinnaanngilaq pingaartumik immikkut ittumik iliuuseqarniarluni neriorsuisimagaanni, perorsaasunut inuiaqatigiinnullu neriulersitsisumik. Unittooqqaneq mumisittariaqarpoq, IA-p siulittaasua Múte B. Egede tusagassiorfinnut nalunaaruteqarluni allappoq.

Neriorsuutisi eqquutsissigit

Múte B. Egedep erseqqissaatigaa partii isumaqatiginninniarnernut isumaqatigiissutinulluunniit nalinginnaasumik ataqqinninneq aallaavigalugu akuleruttarnani.

- Taammattorli perorsaasut atugaasa pitsanngortinnissaat pillugu politikkikkut siammasissumik isumaqatigiissuteqartoqartarpoq. Aningaasanullu Isumaqatigiissut 2020-moortumi tamanna anguniakkatut naqissusigaalluni. Taamaammat politikkikkut sinakkusiisariaqarpugut suliassaqarfik kivilluarumallugu, Múte B. Egede oqarpoq.

Perorsaasut atugaasa akissarsiaasalu pitsaanerulernissaq pillugu, IA kisimi oqariartuuteqanngilaq.

Suleqatigiissitsisunit Tillie Martinussen aamma isornartorsiuereerpoq perorsaasullu akissarsiaat qaffaqqullugit piumasaqareerluni. Taassuma perorsaasut inuiaqatigiinni sallerpaatut meeqqat pillugit siusinaartumik iliuuseqartartutut perorsaasut taavai.

Sermitsiaq.AG-p aningaasaqarnermut naalakkersuisoq, Vittus Qujaukitsoq isornartorsiut pillugu oqaaseqaqquaa. Taassuma isummerluni allaatigisaq aviisimi Sermitsiami tallimanngorpat saqqummertussaq innersuuppaa. Isummerluni allaatigisami erseqqissarneqarpoq politikerit isumaqatiginninniarnernut maanna ingerlasunut akulerunnerat pissuserissaarnerunngitsoq.

Powered by Labrador CMS