IA-mit piumasaqaat: Qulliunerusut inatsisip atornerlunneqannginnissaa qulakkiissavaat

Karl-Kristian Krusep Siumumeersup coronamik ajornartorsiuteqarnermut atatillugu tuaviuussamik inatsisiliaq pillugu oqaaseqartartutut oqaatigaa, innuttaasut ilaat ajoraluartumik pisortat inassuteqaataannik malinnissimanngitsut.

- Inatsit sumut killittoqarsimappat pisinnaatitaaffinnik killiliisinnaaneq pillugu malitassaliornermut atorneqassaaq, taamaammallu pisariaqarpoq, Karl-Krsitian Kruse inuit pisinnaatitaaffiinut tunngatillugu intsimmik ingasaginnillutik isornartorsiuisimasut toqqaanna oqaaseqarfigalugit oqarpoq. Inatsimmullu nassuiaatinit toqqaannartumik atuaanermigut, Karl-Kristian Krusep erseqqissaatigaa, inatsit virusip toqussutaasinnaasup siaruatsaaliorneqarnissaanut taamaallaat atorneqassasoq, atornerlunneqassanngitsorlu.

- Aatsaammi inassuteqaativut malinneqanngippat oqartussat iliuuseqarsinnaapput, Siumut oqaaseqartartuat erseqqissaavoq.

IA allaanerusumik isornartorsiuisoq

IA-p siulittaasuata Múte B. Egedep pingaartippaa, angerlarsimaffip inniminartuunera ulorianartorsiortinneqassanngitsoq, kissaatigalugulu tamanna erseqqissaaffigineqassasoq.

Inatsisip 2021-p naanerata tungaanut atuutsinneqarniarnera isornartoqartippaa.

- Ulloq taanna utaqqeqqaanngikkaluarlugu nualluussuup atugaajunnaarnera periarpat, ullullu nalinginnaanerusut atuleqqeriarutsigit inatsisip atorunnarsinneqarsinnaanera siunnersuutigivarput. Kingusinnerpaamillu Upernaakkut Ataatimiinnermi 2021-mi atorunnaarsinneqasasoq, IA-mi siulittaasoq oqarpoq.

Múte B. Egede aamma inatsisip pisortanit atuutsitsisussanit atornerlunneqarsinnaaneranik nakkutilliisoqarnissaa ujartorpaa.

- Tamatuminnga qulakkeerinnittussatut toqqaasoqartariaqarnera inissaminiissaaq. Siunnersuutigaarpullu partiit siuttuisa maanna naapittarnerat ingerlalereermat partiillu tamarmik tassani sinniisuutitaqarmata, tassuuna qulakkeerinninnissamut suliaqarneq ingerlasariaqartoq, IA-mi siulittaaasoq oqarpoq.

Demokraatit toqqissisimanngitsut

Demokraternes Steen Lyngep Demokraatineersup aamma inatsit akuerineqassappat, paragraf 6, angerlarsimaffiup inniminartuunranik qulalersitsisoq nuannarivallaanngilaa.

- Peqqussut matumuuna sammineqartoq akuerineratigut Naalakkersuisuisut (oqartussaasut) pinngitsaaliillutik peqqissaasinnaanissaannut aammalu pinngitsaaliillutik kuppilersuisinnaanngornissaannut pisinnaatilissavagut. Alloriarneq taamaattoq sakkortuvoq, iliuutsilli taamaattut aatsaat ajornartuuiffimmi imaluunniit allanik aqqutissaarunnermi atorneqarnissaat Demokraatinit pingaartipparput. Isumaqarpugut tamanna siunnersuummut isumaliutissiissummi aalajangerneqassasoq. Tunillaassuinerli unitsinniarlugu taamaaliornissaq pisariaqarsinnaavoq, taamaalinikkullu inuit inuunerannik annaassisinnanngorsinnaavugut. Taannarpiaq peqqutigalugu siunnersuummi tassunga tunngasoq akuerisinnaavarput, Steen Lynge oqarpoq.

Steen Lynge paragraf 6, imm. 2 imatut oqaasertalik pillugu imatut isumaqarpoq:

"Naalakkersuisut imm. 1-imi aalajangersakkat malinneqarneri nakkutiginiarlugit ininut allanullu isertoqarsinnaaneranut tunngasunik nakkutilliinissaq siunertaralugu eqqartuussiviit akuersiseqqaarnagit maleruagassanik aalajangersaasinnaapput."

- Demokraatit isumaqarput inuit ataasiakkaat piginnittussaatitaanerat innarlerneqassanngitsoq. Naalakkersuisut politiilluunniit inuttagut nakkutiginiarlugit inuinnaap angerlarsimaffianut iseniarunik eqqartuussivimmiit akuersissummik peqqaartariaqarput. Peqqussutip allanngorneratigut iliuutsimit tunngaviusumit saneqqutsisinissaq Demokraatit periarfissaasorinngilaat. Taamaammallu kissaatingaarput Naalakkersuisut aappassaaniinnginnerani § 6, imm. 2-p peerneqarnissaanut allannguutissatut siunnersuuteqassasut, Steen Lynge erseqqissaavoq.

Pele Borbegip Partii Naleqameersup aamma paragraffi pineqartoq Steen Lyngemit peeqquneqartoq isumaqatigineqanngilluinnarpoq.