Kommunimut qinersineq 2017

IA-p Siumut kommunip suliffeqarfiutaanni 'aningaasarsiorfissarsiortutut' pisuutippaa

Kommuneqarfik Sermersuumi kommunalbestyrelsemi siunnersuut, Nuup Bussiini aamma Iserit-imi siulersuisunut ilaasortat kommunalbestyrelsemi ilaasortaasariaqanngitsut IA-p Demokraatillu akuersissutigaat. Siumut itigartitsilluni.

Malene Lyngep (IA) Siumut sakkortuumik uparuarpaa

Kommuneqarfik Sermersuup suliffeqarfiutaani siulersuisunut ilaasortat pisinnaasat najoqqutaralugit niuertorpalaarnerusumik ingerlatsilernissaat aqqutissiuuttariaqarnerat, Siumumit akerlilerneqarnera, Malene Lyngep (IA), sakkortuumik isorinnippoq.

Siumup isumaqatigiissuteqarsimanini qimarratigigaa, IA-mi gruppimi siulittaasup tullia isumaqarpoq

Piginnaassusiliineq akuerineqarpoq

Aasaq kommunalbestyrelsip tamarmiusup Nuup Bussiini aamma Iserit-imi, siulersuisut, pisinnaasat najoqqutaralugit niuertorpalaarnerusumik ingerlatsilernissaat aqqutissiuuttariaqartoq, politikerinut toqqaannartumik attuumassutaarullugit.

Aalajangiunneqartorlu qanoq piviusunngortinneqassanersoq IA-kkut Demokraatillu suleqatigiillutik Siumut isumaqatigiissuteqarfigisimavaat.

Taamaakkaluartorli ippassaani Kommunalbestyrelsip ataatsimiinnerani periusissiap atuutilersinneqarnissaata taasissutigineqarnerani Siumut akerliulluni taasiniarluni aalajangerpoq.

– Inuit Ataqatigiinni aamma Demokratini kommunip suliffiutaasa, politikkikkut periarfissinneqarluni ”aningaasarsiorfissatut” atorneqannginnissaannik isumarput aalajangiusimavarput., Malene Lynge (IA) tusagassiuutinut nalunaarusiamini allappoq.

Siumut avataaneersunik sulisoqarusunngilaq

Siumut 'avataaneersunik inuiaqatigiinnik ilisimasaqanngitsunik tikisitsinissaq tulluartinngikkaa' aningaasaqarnermut ataatsimiititaliap suliaani takuneqarsinnaavoq.

– Uanga isumaqarpunga pissusissamisuunngitsoq taamatut periarfissaqartitaasarneq, kommunalbestyrelsimut qinigaasimaneq peqqutigiinnarlugu, politikkikkullu isumaqatigisanut sunneeqataasinnaanermik saniatigooralugu akissarsiorfiutigisumik tunniussuisarneq, Malene Lynge (IA) oqarpoq.

Powered by Labrador CMS