IA-p Siumut itigartippaa - qinersinissaq qanilliallappoq
IA-p siulittaasuata, Múte B. Egedep partiit illuatungiliuttut annersaat Siumumik suleqateqarnissamik isumaqatigiissusiorsimanngitsut oqaatigaa. Taamaasilluni qinigaaffik naatinnagu ikerinnarmi qinersisariaqalerneq suli qalliallaqqippoq.
Inuit Ataqatigiit allaffianni naneruutit ikinneqarput, Erik Jensenilli Naalakkersuisut siulittaasuattut inginnissamut naalakkersuisoqatigiillu akisussaaffiinik torersumik paarlaanissamut isumalluarnera, siulittaasumit Múte B. Egedemit, nalunaaqutaq 13.30 tusagassiortunik katersortitsinermi qaminneqarpoq.
Partiimi siulittaasoq Múte B. Egede aamma siulittaasup tullia Aqqaluaq Biilmann Egede erseqqissaapput politikkikkut silaannaap salinneqarnissaa pisariaqarluinnartoq.
Avissaartuunneq inituallaaqaaq
- Innuttaasut politikkikkut sumut ingerlanissaannik kissaateqarnersut aperissallugit pisariaqarluinnarpoq. Politikkikkut sulinermi pisariaqarluinnalerpoq, siunnerfik suna inuiaqatigiit toqqarusunneraat paasissallugu. Pissaaneqarniunneq avissaartuunnerlu aqutsinermik tigummisuni inituallaalerput. Innuttaasut sorusunnersut, qanorlu ingerlarusunnersut aperineqarnissaat pisariaqalerpoq. Siumut suleqatiginissaannut oqaloqatiginninneq maanna unitsipparput, erseqqissarneqarpoq.
IA-p siulittaasuata oqaatigaa ippassaq tikillugu Siumup siulittaasuanik Erik Jensenimik oqaloqateqarnerit ingerlalluarsimasut. Ataasinngornermili partiimit oqariartuutit assigiinngilluinnartut marluk oqariartuutigineqarsimapput, taamaammallu IA isumaqatigiissusiorniarunnaarpoq.
- Siumup nuna ataatsimoortikkusukkuniuk, taava aamma iluminni ataatsimuulertariaqarput. Suleqatissarsiortigatik iluminni suleqatigiissinnaasariaqarput, Aqqaluaq Biilmann Egede oqarpoq, pissaaneqarniunnerullu unitsinnissaanik kaammattuuteqarluni.
Akunnerit ikaartarfilersortariaqarput
Múte B. Egedep siumut isiginissaq, inuiaqatigiinnilu "qunnerit pilersimasut ikaartarfilersornissaat" pisariaqarluinnartoq oqaatigaa.
- Taamaaliortoqarsinnaavorlu aallaqqaataaneernikkut, soorlu politikkikkut silaannaap salinneratigut, partiip siulittaasua oqarpoq.
IA-mi siulittaasup tullia Aqqaluaq Biilmann Egede Kim Kielsenimut ersarilluinnartumik isornartorsiuivoq:
- Innuttaasut maanna aperineqartariaqalerput, toqqoqqasumik, isertukuluttumik, inuiaqatigiinnullu attaveqanngivissumik ilumut nunamik aqutsisoqarneq qanoq igineraat.
Partiit allat
Erik Jensen Atassutip siulittaasuanik Aqqalu Jerimiassenimik ataatsimeeqateqassaaq. Tassanili qanoq pisoqassagaluarpat ersarilluinnarpoq amerlanerussuteqartunit tatiginnikkunnaarnermik taasititsisoqassasoq, taamaasillunilu Kim Kielsen Inatsisartuni qinigaaffik naatinnagu piffissaanngitsukkut qinersisitsinissamut killinneqartussanngortoq.
Demokraatit aamma Partii Naleraq Siumumik suleqateqassanatik nalunaareerput.
Erik Jensen Siumut allaffiani nalunaaqutaq 14.00 tusagassiortunik katersortitsissaaq.
Ukiukkut ataatsimiinneq 16. februar aallartissaaq, politikkikkullu pissanganarluinnartut ilaat ullormi tassani pissannguatsiavilluni.