KNT
IA-p Siumumi pisortap marloqiusamik atorfeqarnera taamaateqquaat
- Mikael Petersen Siumumi allattaanerusinnaanngilaq saniatigut suliffeqarfimmi pisassinneqartartumi pisortaalluni, IA-p Inatsisartuni ilaasortaatitat siulittaasuat taama isumaqarpoq
Mikael Petersen Siumumi allattaanerua imaluunniit tunisassiorfimmi KNT-mi Namminersorlutik Oqartussanit pisassinneqarnissamik pisariaqartitsisumi pisortaava?
Apeqqut taanna Inuit Ataqatigiit Inatsisartuni ilaasortaatitat siulittaasuata qaqippaa.
Pituttorsimannginnissaq
Taassuma tikkuartorpaa, partiimi allattaaneruniaraanni pituttorsimannginnissamut piumasaqaatinik immikkuullarissunik naammassinnittariaqarneq, minnerunngitsumik naalakkersuisooqatigiinni partiip siuttutut inissisimanerani. Tamannali Mikael Petersenimut tunngatillugu killormoorluinnartoq, Peter Olsen isumaqarpoq.
- Ulluni kingullerni tupinnaqisumik Siumumi allattaaneq aalisarnermik ingerlatseqatigiiffimmi pisortatut saqqummertaarpoq Siumup allattoqarfianiit. Maannakkulli Siumut allattaaneqarput KNT-imi pisortaasoq, pisassanillu qinnuteqartartoq, qinnuteqaatillu parteeqataanit suliarineqartarlutik.
Taamatut aningaasaqarnikkut soqutigisat akulerussuunneri akuersaarneqarsinnaanngitsoq, Inatsisartuni ilaasortaatitat siulittaasuat isumaqarpoq.
Atuaruk: IA: Krusep avaleraasartoortassat imminut sullilluni agguaappai
Taakkartuineq
Tassunga atatillugu Peter Olsen pingasunik taakkartuivoq:
- Siumumi allattaaneq avaleraasartuunik qinnuteqarpoq, februarimilu Aalisarnermut pisortaqarfimmut nukingisaarivoq pisassinneqarnissamik. Maannakkut aamma piumasarilerpaa Naalakkersuisut Royal Greenlandimut isumaqatigiissutertik atorunnaarseqqullugu. Partii Siumut kammalaatersornini qanigisallu aningaasarsiornikkut iluaqusersuinini unitsittariaqarpaa, Peter Olsen naqissusiivoq.
Taassuma Siumup partiiata kammalaatersornermik ingerlataqarnermik unititsiniarluni neriorsuutaa assorsuaq maqaasinarnerarpaa.