IA-p saarullittassiissutit qaffannikut attatiinnarusuppai

Sinerissap qanittuani siorna saarullittassiissutit 25.000 tonsinut inissinneqarput. Oktobarimi 8.000 tonsinik ilaneqarput, decembarimilu 1.400 tonsinik ilaqqinneqarput.

Pisassiissutit katillugit 34.400 tonsinngorput, imaluunniit biologit innersuussaannit 12.379 tonsiusunit pingasoriaatingajammik annertuneruvoq.

Atuaruk: Saarullittassat 8.000 tonsinik amerlineqarput

IA: Pisassiissutit tulluartut
Taakkulu pisassiissutit tulluartuusut, Inuit Ataqatigiit aalisarnermut ataatsimiititaliami ilaasortaatitaat, Hans Aronsen isumaqarpoq.

- 2016-mi pisassiisutaasut ilassutaasimasullu ataatsimut katinnerat annertussusiliullugu 34.000 tons aamma 35.000 tons naapertorlugu pisassiisoqarnissaa Naalakkersuisunut innersuussutigiumavara, taanna tusagassiuutinut nalunaarummi allappoq.

Ukiormanna pisassiissutissat suli nalunaarutigineqanngillat, kisianni ulluni qaninnerni saqqummiunneqarnissaat naatsorsuutigineqarpoq.

Atuaruk: Saarullittassiissutit siunnersuutigineqartunit pingasoriaammik amerlanerupput

Naalakkersuisut pisassiissutit amerliniarlugit isumaliutigigaat, tassunga atatillugu Hans Aronsen (IA) ersarissumik isumaqarpoq.

Tamatumunngalu atatillugu tunisassiorfiit tunitsiviillu pisassiissutigineqartussanut tamakkiisumik ingerlaavartumillu tigooraanissaat qulakkeerneqarsinnaanersoq apeqqusiivoq.

- Neriuppugut pissutsit tamakku nalilersorluarlugit naalakkersuisut pisassiinermi sulissasut, taanna allappoq.

KNAPK-p 45.000 tonsit kissaatigaat
Pisassiissutit amerleriaqqinneqarnissaannut suli inissaqartoq, KNAPK isumaqarpoq. Tassanngaanniik 45.000 tonsit innersuussutigineqarput.

Biologit innersuussutaannit pingasoriaammik affaanillu qaffanneqarnissaannut tunngavilersuutigaat, Pinngortitaleriffiup paasissutissaataat killeqarpallaarnerat, Nuummi Sisimiunilu taamaallaat misissuinernit tunngaveqarmata.

- Sineriassuatsinni Nuuk aamma Sisimiut kisimik saarulleqanngillat, naagga Paamiuniit avannamut Upernavikkut tikillugit annertuumik saarulleqarpoq, KNAPK siulittaasua Henrik Sandgreen, tusagassiuutinut nalunaarummi taama allappoq.

Pinngortitaleriffiup saarulliit amerlassusaat nalilernerlukkaat, taanna isumaqarpoq.

- Aalisartut misilittagaat ilisimasaallu imak oqarput; ukiorpassuarni aatsaat taamak saarulleqartigaaq, nangilluni allappoq.

Paasissutissat pitsaanerusut
Paasissutissanik katersuineq nukittorsarneqartariaqartoq, Hans Aronsen (IA) isumaqarpoq.

- Ilanngullugu pinngortitamut misissuisoqarfitta imartarujussuatsinnut naleqquttumik sulisinnaalernissaanut nukittorsaanissaannik, kiisalu aalisartut umiatsiaararsortut mikisunillu angallatillit aalisarnermi periusaasa ilisimasaasalu nalilersuutigineqartarnissaannuttaaq atortussanngorlugit katersorneqarnissaat upernaakkut ataatsimiinnissamut qaqitaqarnissara siunniussimavara, taanna allappoq.

Saarulliit kinguaariit tulliuttut ernumagalugit, Pinngortitaleriffiup arlaleriarluni oqaatigisarpaa.