Skip to main content

IA-p qineqqusaarutigaa: Kikkut tamarmik siuariartortoqarnera malugissavaat

Nunap isumalluutai pitsaanerusumik atorneqassapput, sanngiinnerpaat pisariaqartitaminnik ikiorserneqassapput innuttaasullu ataasiakkaat aalajangeeqataanerusalisaspput, IA-mit taamatut isumaqartoqarpoq.

Inuit Ataqatigiit qineqqusaarutertik ”Isumassuineq akisussaaqatigiinnerlu” tallimanngormat tusagassiorfinnut saqqummiuppaat.

- Inuit Ataqatigiit ilaqutariit nukittuut pilersinniarlugit, inuussutissarsiuteqartut nukittuut pilersinniarlugit isumalluutinillu pitsaanerusumik atuisoqarnissaa anguniarlugu qineqqusaarput, IA-mi siulittaasoq Múte B. Egede oqaluttuarpoq.

IA ”Isumassuineq akisussaaqatigiinnerlu” qulequtaralugu qineqqusaarniarpoq, partiillu apriilip arfernani Inatsisartunut kommuninullu ataatsikkut qinersisoqarnissaa atorlugu kommunit akisussaaffeqarnerulersinniarpai.

Kommunerujussuanngortitsinermi akisussaaffinnik kommuninut tunniussisoqarnerunissaa siunertarineqarsimavoq. Tamannali suli pisimanngialq, maannali piffissanngorpoq akisussaaffinnik amerlanerusunik tunniussinermut peqatigitillugu illoqarfiit nunaqarfiillu tamarmik siuariartornermik misigisaqartinniarlugit kommunit oqartussaaffeqarnerulersinneqarlutillu amerlanerusunik aningaasaliiffigineqartarnissaat:

- Nunap aningaasaqarnera nunamilu nukissaqarluartut inuiaqatigiinnut tamanut iluaqutaasussanngorlugit aqussavavut, taamaaliussaagut qitiusumik aqutsisoqarfiup allanngortiterneratigut, Múte B. Egede oqarpoq. Aningaasaqarnerulli qanoq ittuunissaa aningaasallu pisariaqartinneqartut qanoq annertutigissanersut oqaatiginngilaa.

Aningaasaqarnermut Siunnersuisoqatigiit 2020-mi nalunaarusiaminni erseqqissaatigaat, pisortat ingerlataqarfiannik pisariillisaanissaq Kalaallit Nunaata iluatsissimanngikkaa, pisariillisaanermi 2030-mi 600 millioner koruuninik sipaaruteqartitsisussaagaluarpoq.

Aningaasaqarnermut Siunnersuisoqatigiit siusinnerusukkut nalunaarusiaminni oqaatigisimavaat, 2035-p tungaanut pisortat isertittagaannut sanilliullugu pisortat 1 milliard koruunit missaannik aningaasartuuteqarnerulissasut.

Atugarissaartuuneq qaffassarneqassasoq

Inuit Ataqatigiit qineqqusaarnermi atugarissaartuuneq aamma nunaqarfimmi illoqarfimmiluunniit najugaqaraluaraanni pitsaanerusumik atugaqartoqarnissaa ukkatariniarpaat. Partiimit erseqqissaatigineqarpoq, sanaartugassanut inissialiornissanllu aningaasaliissutigineqartartut kommuninut tunniunneqartassasut, taamaalilluni nunap immikkoortuini tamani siuariartortitsisoqassalluni.

- Nunami suliaqartitsinikkut kaaviiaartitat annerulersissinnaavagut, tamannalu nunap ineriartorneranut aallaavinngortillugu, taanna oqarpoq nangillunilu oqaatigalugu:

- Patajaattumik ineriartortitsinikkut inuiaqatigiinni sanngiinnerpaat ikiorserneqarnissaannut aamma periarfissaqalersitsissaagut.Anguniagaraarput ineriartornerup aqqani qimataqannginnissarput, Múte B. Egede oqarpoq.

Taassuma erseqqissaatigaa, partiimit anguniarneqartoq kommunini tamana nunamilu tamarmi ilaqutariit suliffeqarfiillu pitsaasunik sinaakkuteqarnissaat aamma ilaqutariinneq suliffeqarnerlu imminnut ataqatigiilluinnartut.

Qinersisoqareerpat akisussaaffiit agguataarneqassasut

Múte B. Egede kommunit qaqugu akisussaaffeqarnerulersinneqarnissaannut pilersaarummik saqqummiussinngilaq.

Suliassatut oqaatigineqartut assersuutigalugu ilagaat, nunalerineq pillugu allaffeqarfik Stine Egedep Kommuni Kujallermeersup ujartorsimasaa.

Partiimili siulittaasup erseqqissaassutigaa, qinigaaffimmi tulliuttumi akisussaaffinnik agguassineq aallartinneqassasoq.

- Ilanngullugu kommuninut aningaasatigut tapiissuteqartarneq allatut ingerlanneqalissaaq, tassa akisussaaffiit aningaasaqarnikkullu atugasiissutit immikkut ataqatigiissilerlugit. Kommunini nunamilu ineriartortitsisoqarnerani innuttaasut arlaannaataluunnit atugai ajornerulersinneqassanngillat, taanna nassuiaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER