piitsuuneq
IA-p piitsut naatsorsortinniarpai
Inuit Ataqatigiit piitsuussutsip killiffilerlugu aalajangiiffigineqarnissaa piumasaraat – Tamanna iluaqutaanani paatsiveerussaataaginnaassaaq, Siumumit akipput
Namminersornerulernerup eqqunneqarneranit ukiut 38-t aamma Namminersornerup eqqunneqarneranit ukiut arfineq-pingasut qaangiuttut suli Kalaallit Nunaanni meeraqarpoq kaallutik innartartunik.
– Inuiaqatigiinni inuuniarnermi atukkat pitsanngorsarneqarnissaat assigiinngissutsillu annikillisinneqarnissaat anguniaraavut, Isumaginninnermut, Ilaqutareeqarnermut, Naligiissitaanermut Inatsisinillu atortitsinermut Naalakkersuisoq, Sara Olsvig oqarpoq.
Assigiinngissutsit annikillisinniarlugit piitsuussutsillu appaasinnerpaaffianut killilerlugu aalajangiiffigineqarnissaanut periarfissaqarniarluta naatsorsuutigisat pillugit Naalakkersuisut nassuiaasiorsimapput.
Nassuiaat sapaatip-akunneri marluk qaangiuppata naammassineqassaaq tamatumalu kingorna maannakkut ukiaanerani Inatsisartut ataatsimiinneranni ilaasortanut agguaanneqassaaq.
Piitsuussutsip appasinnerpaaffia tassaavoq isertitat piitsuunani inuussutigineqarsinnaasut ikinnerpaaffissaannik taasilluni killiffik.
Piitsuussutsip appasinnerpaaffianik killiliinissamut 2015-imi Naalakkersuisut akerliupput.
Inuit Ataqatigiit piitsuussutsip killissaanik atuuttussanngortitsiniarput, taamaalilluni ajornartorsiut ilisimaneqalerniassammat. Siumut, maannakkut inuiaqatigiiusunik ilusilersuisunut pisortaasoq akerliuvoq.
– Inissiarsuarni, illoqarfinni nunaqarfinnilu piitsuussuseq takusarpiuk?
– Oqaaseq piitsuussuseq atorusunngilara, Kim Kielsen, Sermitsiamut oqarpoq.
Innuttaasut affaat SIK-mi akissarsiat ikinnerpaaffiannik ikinnerusunik isertitaqartut Kim Kielsenip nassuerutigaa.
– Iluarsisinnaasatsinnik ajornartorsiuteqartoq tamatuma takutippaa.
Piitsuussutsimilli ajornartorsiummik kisitsisitaliisumik killiliinermut taarsiullugu Kim Kielsenip ukiuni kingullerni inatsisitigut suliniutit ilinniagaqarsimanngitsut ilaatigut piginnaasaannik qaffaasussaasut eqqaavai, taamaallutik suliffeqarnermi inissinnissaminnut piareersimanerussammata.
Tamanna pillugu Sermitsiami paasisaqarnerugit: