IA-p nuna tamakkerlugu ataatsimeersuarnera: Oqallittoqanngilaattaani eqqissisimasoqartoq

Qinersinerni assigiinngitsuni angusaqarluarsimanerit kingornatigut, IA-p nuna tamakkerlugu ataatsimeersuarnerani maannammut aqutsisunut tapersersuilluartoqarpoq. Imaassinnaavorli nipituuliortoqannginnerani eqqissisimasoqartoq, sapaatiuppammi partiip politikkikkut siunnerfii pillugit oqallittoqartussaavoq.

Inuit Ataqatigiit nuna tamakkerlugu ataatsimeersuarnerat Nuummi Hotel Hans Egedemi nunami tamarmit aallartitat katersuuffigisaanni arfininngornermi aallartinneqarpoq.

Partiip qinersinerni arlalinni angusaqarluarsimanerata kingornatigut nuna tamakkerlugu ataatsimeersuarnermi siullermi qinersinerni angusaqarluartarsimaneq malunnarpoq.

Qinersinerit pineqartut tassaapput 2019-imi folketingimut qinersineq, ukioq manna Inatsisartunut nunamilu kommunalbestyrelsinut qinersinerit. Qinersinerni taakkunani pingasuni, IA maanna Naalakkersuisunik aqutsisuusoq kommunillu tallimaasut akornanni pingasuni borgmesteriutitaqalersimasoq qinigaalluartarsimavoq.

Aviisimi Sermitsiami politikkikkut aaqqissuussisoq Jensine Berthelsen nuna tamakkerlugu ataatsimeersuarnermut malinnaasoq taamatut oqaluttuarpoq:

Sapaatiuppat oqallittoqarnissaa pissanganarsinnaasoq

- Politikkikkut oqallinnissaq suli inissinneqanngilaq, maannamullu ingerlatsisoqarneranik isumaqatiginninngittoqarnersoq malunnarani, Jensine Berthelsen oqarpoq.

Aaqqissuisulli oqaatigaa, nuna tamakkerlugu ataatsimeersuartoqarnerani imaanngitsoq oqallittoqassanngitsoq. Sapaatiuppat partiip ukiunut aggersunut siunnerfii oqallisigineqartussaapput, tassanilu partiip iluani isumaqatigiinngissutaasut qaqilerneqarsinnaallutik.

Jensine Berthelsenip oqaatigaa, IA-p naalakkersuisooqatai Naleqqakkut, IA-mi ilaasortat ilaannit nuannarineqanngitsunik arlalinnik oqaaseqartarsimasut.

Tassani pineqarput Danmarkip Kalaallillu Nunaata suleqatigiinnerat kiisalu Kalaallit Nunaanni sakkutuunngorniarnermut misilitsinnissamut periarfissap apeqquserneqarsimanera. Kingullermut pineqartumut tunngatillugu IA sinnerlugu folketingimi ilaasortaq Aaja Chemniz Larsen isumaqataanngilluinnarpoq, sapaatippallu partiimi aqutsisunut qinigassanngortinnissani oqaatigereernikuuaa.

-Partiimi susoqarniarnersoq paasisaqarfigissallugu pissanganarpoq. Pingaartumik Naalakkersuisuni suleqatiittoqarnera eqqarsaatigalugu. Apeqquteqarpoq akissutissarsineqarsimanngitsunik, Jensine Berthelsen oqarpoq.

Powered by Labrador CMS