Niuernermut Angallannermut Inuusuttunullu tunngasunut Naalakkersuisuusimasoq, Johanne Petrussen, 72-inik ukioqarluni, pingasunngornermi 31. maj toquvoq.

Parteersimasaa, Inuit Ataqatigiit, ilaqutaasunit kalerrinneqareersimalerlutik, eqqaaniuteqarlutik taama allapput.

Johanne Petrussen, tusagassiortutut ilinniagaqartoq, Inuit Ataqatigiit tunuliaqutaralugu partiimi arnani siullersaalluni Naalakkersuisuusimavoq, 1988-imi Niuernermut, Angallannermut, Inuusuttunullu tunngasunut Naalakkersuisuugami. Taanna sioqqullugu, 1987-imi Folketingimut qinersisoqarmat IA tunuliaqutaralugu qinigassanngortippoq, qinigaananili.

Arnaq tamatigoortoq naligiinnerunissamik suliaqartoq

Inuit Ataqatigiit Facebookimini allappoq Johanne Petrussen, Juana, arnaq tamatigoortuusoq inuiaqatigiinnilu naligiinnerunissamik annertuumik suliaqartuusimasoq.

- Juanap inuiaqatigiinni oqartussaaffiit inuiaqatigiit ingerlanneqarnerannut pingaarutillit inuiaqatigiinnut sunniuteqartarnerat pingaartillugu eqqummaariffigalugulu sulisimavoq. Sulinermini erseqqissartuarsimavaa ingerlatseqatigiiffiit inuiaqatigiit pigisaat pisisartunut atuisartunullu iluaqutaasussaanerat taamatuttaarlu tusagassiuutilerinermi inuiaqatigiinni tusagassiornerup tutsuiginartuunissaa pingaartillugu suleqataasimalluni, Inuit Ataqatigiit allapput nangillutillu:

- Sulinermini uummateqarfigilluarpaa naligiisitaanermut tunngasunik suliaqarneq, arnat angutillu inuunerannut sunniuteqartunik suliaqarnissaminut tunuarsimaartuusimanngilaq. Soorlu aamma 1980-ikkut naalernerani Paarisami sulinermini AIDS-imut akiuiniarnermi pimoorussilluni suleqataasimalluni.

Johanne Petrussen, KNR-imi 1993-1995-imi aamma pisortaasimasoq, qitornaqarpoq ernutaqarlunilu.

- Inuit Ataqatigiit Kattuffiata Juanap qitornaanut ernutaanut ilaqutaanullu misiginneqatiginninnnini ersersillugu assit Juanap partiitsinni suleqataaneraneersut ikkuppai, Inuit Ataqatigiit allapput.