IA-p Naalakkersuisut akitsuutit taamaatiinnarmatigit nersualaarpaat

Naalakkersuisut ikummatissanut aamma neqinut akitsuutissatut siunnersuutaat eqqarsaatigilluagaanngillaat innuttaasunillu annertuumik eqquinerlussimasussaagaluarlutik. Taamaammallu naalakkersuisooqatigiit taakkununnga akitsuusersuinissaq taamaatiinnarmassuk Inuit Ataqatigiit nuannaarutigaat, partiip aningaasaqarnermut oqaaseqartartua, Naaja Nathanielsen tusagassiuutinut nalunaarummi erseqqarissaavoq.

Tupa akisuneq
Inuit Ataqatigiit erseqqissarpaat, partii neqinut ikummatissanullu akitsuusersuiniaraluarnerit taartissaannik nassaarumallutik ilungersorlutik sulisimallutik.

- Taamaammat akitsuutitut siunnersuutaasunut arlalinnut tapersersuissaagut, soorlu mamakujuttunut, sunoorsinut sukuluunut qummoroortartunullu akitsuusersuiniarnerit, siunnersuutigisimasatsituullu imertakkanik energidrik-inillu eqqussanik akitsuusersuiniarnerit.

- Tamatuma saniatigut naalakkersuisooqatigiit allaffissornermik annikillisaaniarnerat isumaqatigaarput, nuannaarutigaarpullu tassunga atatillugu peqqinnissaqarfimmi sipaaruteqannginnissamut upernaami aningaasanut inatsimmut isumaqatiginninniarnermi piumasaqaaterput tusaaneqarsimammat. Kommunit aamma sipaarfigineqannginnissaat isumaqatigaarput ilinniartitaanermullu tunngasuni annikinnerusumik taamaallaat sipaaruteqartoqarnissaa aamma isumaqatigalutigu, politikeri tikkuartuivoq.

Sangujoraartut
Illuatungiliuttut aamma Naalakkersuisut akitsuusersuinissaq tamaat isumaqatigiissutigisinnaanngilaat.

- Sinerissap qanittuani qaleralinniarnerup akitsuusersorneqarnissaanut siunnersuut arfininngornermi isumaqatiginninniarnermi saqqummiunneqartoq Inuit Ataqatigiit isumaqataaffiginngilarput, taamaammallu Inuit Ataqatigiit Naalakkersuisut naalakkersuisooqatigiillu partiivisa akornanni isumaqatigiissut atsioqataaffiginngilarput. Eqqumiigaarput Naalakkersuisut isummiussimasartik attanniarnagu arfininngormalli ilisimatinngimmatigut. Naalakkersuisut taamatut sangujoraarnerat naalakkersuisooqatigiit akunnerminni isumaqatigiissinnaannginnerattut paasivarput, Naaja Nathanielsen isumaqarpoq.

Iliuusissanik allanik siunnersuuteqaraluartut
Inuit Ataqatigiinnit iliuusissatut allatut erniat ilanngaataasinnaanerisa appartinneqaqqinnissaat tikkuaraluarpaat.

Taanna siunnersuut Inuit Ataqatigiit naapertorlugit, Akileraartarnermut Atugarissaarnermullu Isumalioqatigiissitaliarsuup Aningaasaqarnermullu Siunnersuisoqatigiit inassutaannut naapertuussimassagaluarpoq.

Inuiaqatigiinnik eqquinerlunngitsoq
- Nammaqatigiinnerunermik kinguneqarsimassagaluarpoq 12 millonit koruunillu isertitsisinnaasimassagaluarluni. Siunnersuuterput partiit ilaasa akileraarummik qaffaanissamik siunnersuutaannut sanilliullugu innuttaasunik ikinnernik aningaasartuutinillu annikinnerusunik eqquisimassagaluarpoq, Naaja Nathanielsen oqarpoq.

Periusissaq
Isumaqatiginninniarnerit ingerlaneranni Inuit Ataqatigiit partiit akimorlugit akileraartarneq, inunnik isumaginninnermi ineqarnermullu aaqqissuusseqqinnissat pillugit eqqartueqatigiinnissaq qanoq ingerlanneqarnissaat pillugit pilersaaruteqarnissaq piumasaqarput.

- Suliaq tamanna pingaartinneqarluinnartariaqarpoq. Aaqqissuusseqqinnissat taakkua aallartinneqartariaqarput. Taamaammat aamma eqqumiigaarput Naalakkersuisut aaqqissuusseqqinnissat taakkua pillugit isumaqatiginninniarnerit aallartinnagit aningaasat ikinnerusut karsimi putunik matussusiiniarnernut tunngasut nukippassuarnik atuiffigimmassuk, politikeri isumaqarpoq.

Atuaruk: Naalakkersuisut akitsuutinut tunngasuni ikinnerussuteqartut