IA-p mittarfiliornissanut siunnersuutaat: Nuuk siulliunneqarli - Ilulissani mittarfik naanneruli
Inuit Ataqatigiit mittarfiliortiternissanut siunnersuutertik saqqummiuteqqammerpaat. Mittarfiit ataasiakkaarlugit sanaartorneqassapput. Kangerlussuup attanneqaannarnissaa siunnersuutaavoq.
Annonce
Mittarfiliortiternissanut atatillugu Inuit Ataqatigiit siunnersuutertik tusagassiortunik katersortitsinermi saqqummiutileruttorpaat. Naalakkersuisut siunnersuutaannit allaaneruvoq.
Pingaarnertut maluginiagassat:
- Aningaasat kaaviiaartitat amerlavallaalernerisigut akit aqunneqarsinnaanngitsumik qaffariataarsinnaanissaat kissaatigineqanngilaq suliffeqarfeqarnikkullu mianerinninnerusumik IA periuseqarusulluni
- Nuummi mittarfeqarnermit nunap sinnerani angallannikkut aaqqiilluarnissamut atortariaqarpoq. 2200 meteri sanaartorneqarli. Atulereerpat isertitat allanut mittarfiliornernut aningaasat atorneqarlik
- Ilulissani 2200 meter aallartissutigineqassanngilaq. Mittarfissamut inissisimaffik nutaaq sanaartorfigineqassaaq siunissami talleqqissinnaanissaa qulakkeereelugu
- Qaqortumi mittarfittaassap avataanit attartornikkut aningaasalersorneqarani nunatta karsianut aningaasalersorneqassaaq. Narsarsuup siunissaa pillugu pimoorussisoqartariaqarpoq, Kommune Kujalleq qanimut suleqatigalugu
- Kangerlussuaq attanneqaannassaaq. Kangerlussuup ullumikkornit suli annertunerusumik ineriartortinneqarnissaa pisariaqarpoq, takornariaqarnikkullu tamakkiisumik siuariartortitsiffigilluassallugu tulluartinneqarpoq.
- Danmarkimit aningaasaliinissaq tikilluaqquarput. Inatsisartullu tassaassasut naggataatigut atugassarititaasunik akuerinnittuussasut piumasaqaatigaarput.
- Illoqarfinni minnerni ujaraaqqanik qallikkanik mittarfiliornissanut piareersarnerit nangittariaqarput, nunarput tamakkerlugu ataqatigiissagaanerusumik atugaqalernissaq pillugu. Illoqarfiit pisneqartut tassaapput Qasigiannguit, Qeqertarsuaq, Kangaatsiaq, Narsaq, Nanortalik, Ittoqqortoormiillu. Tasiilami mittarfittaarnissamik misissueqqaarnerit aamma nangikkumaneqarpoq.