IA-p klassini atuartut amerlassusaat apparniarpaat

Inuit Ataqatigiit ingammik ilungersuussat pingasut qineqqusaarutigaat. Meeqqat atuarfiini klassini atuartut 26-nit 18-inut ikilisinneqassapput. Inissianik nalinginnaasunik 1.000-nik sanaartortoqassaaq aamma aallarnisaasut ukiuni pingasuni akileraanngissinnaatitaanissaat, taamaalilluni inuiaqatigiinni ineriartortitseqqittoqarniassammat.

Inuit Ataqatigiit siulittaasuat, Sara Olvsig, partiip qineqqusaarutai Nuummi Inuk Hostelimi saqqummiunneqarmata siuttuuvoq.

Nunatsinni partiit annersaata tulliata Inuit Ataqatigiit qinersinermi anguniakkatik ataasinngornermi saqqummiuppaat, partiillu ilungersuussassap pingasut ingammik eqqarsaatigineqartut isertuutinngilaa: meeqqat atuarfiat, ineqarneq aamma aallarnisaasunut atugassarititaasut pitsaanerusut, suliffinnik amerlanerusunik pilersitsisoqarniassammat.

Pingaarnerit

Partiimi siulittaasup, Sara Olsvigip, pingaarnerit saqqummiuppai, Muté Bourup Egedellu partiip ineqarnermut politikkianik itisiliivoq, Aqqaluaq B. Egedellu ilinniartitaanerup pitsanngorsakkamik aaqqissuussaaneranut partiip takorluugaanik saqqummiussilluni.

- Meerartagut pitsaasumik ilinniarsinnaanissamut pisinnaaffeqarput, ilinniartitaanerullu aaqqissuussaanera pitsanngorsarneqassaaq. Meeqqat atuarfiini atuartut 80 procentiisa ilinniaqqittarnissaat partiip anguniagarigaa Aqaluaq B. Egedep oqaatigaa. Tamannalu 2030-imi anguneqareersimassaaq.

Ilinniartitsisut marluutinneqartarnerat

Atuartuni minnerni ilinniartitsisut marluutinneqartarnissaat aamma klassini atuartut amerlassusaat 26-nit 18-inut apparneqarnissaat kissaatigineqartoq, partiip saqqummiuppaa.

Marlunnik ilinniartitsisoqarneq perorsaasumik aamma ilinniartitsumik inuttaqarsinnaasut, Sara Olsvigip itisilerpaa.

Atuartorpassuit angerlarsimaffitsik qimallugu atuartut angerlarsimaffianniittariaqartartut aamma ukkatarineqarnerulissapput.

- Atuartut angerlarsimaffii ulloq unnuarlu paaqqinnittarfinngortinneqassapput, inersimasut meeqqat ajornartorsiutaannik isumaginnissinnaanngorlugit. Tapersersuisinnaasumik peqartariaqarput, Aqqaluaq B. Egede nassuiaavoq.

Inissiat nalinginnaasut 1000-t

Ineqarsinnaatitaaneq aamma partiip eqqarsaatigaa, ineqarnermullu tunngasumik aaqqissuusseqqinnermik inissianik nalinginnaasunik 1000-nik nutaanik 2030 angutinnagu qulakkeerinnissinnaasumik kalerriuteqarput-

- Kikkut tamarmik ineqarnissaminnut pisinnaatitaaffeqarput, inissianillu sanaartorutta eqqarsartarnerput naapertorlugu aaqqissuusseqqissaagut, Mute B. Egede oqarpoq.

Inissianik ataavarnerusumik sanaartornissaq pisariaqartoq oqaatigaa, tassanilu meeqqat, angajoqqaat aamma angajoqqaat angajoqqaavi najugaqatigiissinnaasariaqarlutik.

Ineqarnermut tunngatillugu aningaasaliissuteqartarnermut aaqqissuusseqqinnerit piviusunngortinnissaannut, attartortuunermit inissiamik piginnittunngornissamut periarfissat amerlisarneqartariaqartut, IA isumaqarpoq.

Aallarnisaasunut akileraartitsinnginneq

Aallarnisaasut isumassarsiaqartut, suliffinnillu pilersitsillutik piviusunngortitsiniartut isumagineqarluassasut, partiimi siulittaasoq oqaluttuarpoq.

- Aallarnisaasut oqartussani ”matut matoqqasut” aporfigissanngilaat, Sara Olsvig oqarpoq, partiillu aallarnisaasut ukiuni pingasuni akileraartannginnissaat piareersimatikkaa siumut kalerriuteqarpoq, taakku suliffinnik nutaanik pilersitsisinnaagamik, iniuaqatigiinnilu ineriartortitsinermik qulakkeerinnillutik.

Powered by Labrador CMS