Folketingimut qinersineq

IA-p inuusuttortaasa siulittaasuat Folketingimut qinigassanngortippoq

28-nik ukiulik Múte Bourup Egede Inuit Ataqatigiit tunuliaqutaralugit Folketingimut qinigassanngortippoq. Partiimit qinigassanngortittut sinneri sisamanngorpat saqqummiunneqassapput

Inuusuttut Ataqatigiinni siulittaasoq Múte Bourup Egede Folketingimut qinigassanngortippoq

Inuit Ataqatigiit Folketingimi ilaasortaatitaat Johan Lund Olsen, Folketingimut qinersinissamut qinigassanngorteqqinnissani oqariartuutigisareerpaa.

Inuusuttut Ataqatigiinni siulittaasoq Múte Bourup Egede Folketingimut qinigassanngortinnissaa pillugu Inuusuttut Ataqatigiit nalunaaruteqarput.

- Inuusuttut Ataqatigiinni Folketingimi innuttaasut atugaat pillugit sulilluarsimanerup nanginnissaanut piareersimalluinnarpugut. Inuusuttut Ataqatigiinniillu nukissaqarluarluta nuannaarutigalugu nalunaarutigissavarput siulittaasorput Múte Bourup Egede Folketingimut qinigassanngortikkatsigu, Inuusuttut Ataqatigiit tusagassiutinut nalunaaruteqarput.

- Qularinnginnatsigu Mútep suleqateqarluarnermigut nipi ersarissoq pituttorsimanngitsorlu atorlugit nunarput inuilu sullilluarumaarai.

Inuit Ataqatigiit tunuliaqutaralugit Folketingimut qinigassanngortittussat tusagassiortunik katersortitsinermi sisamanngorpat nalunaaqutaq 15.00 nalunaarutigineqassapput.

Folketingimut qinersisoqassaaq juunip 18-ani.

Powered by Labrador CMS