isumaqatigiinnginneq

IA-p Demokraatillu Inatsisartut ataatsimiittarfissaat oqqatigigaat

Inatsisartut ataatsimiittarfissaat nutaaq pillugu oqallinnermi, Demokraatit kisitsisinik kukkusunik taakkartuisut IA isumaqarpoq

Demokraatit kisitsisit eqqunngitsut saqqummiukkaat, Ane Hansen (IA) isumaqarpoq

Inatsisartut ataatsimiittarfissaannik sanaartornissamut Inuit Ataqatigiit tapersersuinertik taamaatissagaat, ippassaq ataasinngornermi Demokraatit kaammattuipput.

Atuaruk: D IA-mut: Inatsisartut ataatsimiittarfissaannut tapersersuinersi taamaatissiuk

Inuit Ataqatigiit ullumikkut akissuteqarput. Demokraatit ataatsimiittarfissaq nutaaq 300 millionit koruuninik akeqarnerarlugu oqarnerat kukkulluinnartoq, taakku isuamqarput.

- Paaserusunnarsilerpoq sumiit kisitsit taanna pissarsiarisimaneraat, Ane Hansen (IA) tusagassiuutinut nalunaarummi taama allappoq.

Kusanaatsuliorluni nittarsaassineq
Demokraatit tunngavissaqanngitsumik saassussisut, taanna isumaqarpoq.

- Suli isummersortoqangitsoq Demokraatit Inuit Ataqatigiit eqqungitsunik tungavilersorlutik kusanaatsuliorlutillu nittarsaanniarsaraat, aningaasanik 300 millionit koruuninik taakkartuillutik, sunaana taanna pissuseq?, Ane Hansen aperivoq.

Atuaruk: Inatsisartut ataatsimiittarfiissaannut D naaggaariiginnarpoq

Illumut nutaamut siunnersuut oqallisigineqassasoq
Nutaamik illuliornissamut siunnersuut maanna tallimanngorpat oktobarip 21-anni suliarineqassaaq.

Tassani 'Inatsisartut ataatsimiittarfissaannik, allaffissornikkut sullissiviit ilanngullugit, nutaamik sananissamik 2013-imi novembarimi tunngaviusumik isummernerup Inatsisartunit ilalerneqarnissaanik Inatsisartut aalajangiiffigisassaattut siunnersuut' tamanna pineqartoq siunnersuummi allaqqavoq.

Aaqqiissutit assigiinngitsut
Siunnersuummut ilanngussat ilaanni periarfissat pingasut misissorneqarsimapput, tassa nutarterineq ilassusiinerlu, massakkut Inatsisartoqarfiup nalaani nutaaliorneq imaluunni allami nutaaliorneq.

Taakku nutaaliornissamik siunnersuutit marluk 223 millioninik aamma 195 millioninik aningaasartuutaaffiussapput. Nutarterinerlu 120 millionit koruuneqassaaq, taanna sivikinnerusumik atasinnaassaaq. Tassanilu 300 millionit koruunit pineqanngillat.

Atuaruk: Inatsisartut ataatsimiittarfissaannik takorluugaq uummarsaqqikkaat

Illu attattoqqinneqassaaq
Tassanili aamma allamik kisitassaqarpoq. Tassami siunnersuummi takuneqarsinnaavoq, illu allamit pigitinneqarsinnaasoq, taamaalillunilu attartorneqarsinnaalluni. Taamatut aaqqissuteqarneq Namminersorlutik Oqartussat Nuuk Centerimi atoreerpaaq.

Tamanna ukiuni 30-ni isumaqatigiissummik taamaatinneqarsinnaanngitsumik, 10, millionit aamma 12,5 millionit akornanni akeqartumik pissaaq. Taamatullu kisitsissagaanni, ukiut 30-t ingerlanerini katillugu 300 millionit koruunit sinnerlugit aningaasartuuteqartoqassaaq.

Powered by Labrador CMS