Skip to main content

IA-p ajugaanera patajaattumik ingerlatsisoqalernissaanut Danmarkimi neriuutigineqartoq

Martin Lidegaardip (R) neriuutigaa, Kalaallit Nunaanni qinersinerup inernera aningaasaliissuteqartartut amerlanerulernissaannik qulakkeerinnisssasoq. Karsten Høngep SF-imeersup aamma qinersinerup inernera naammagisimaarpaa.

Kalaallit Nunaanni qinersinerup inernera Folketingimi partiinit arlalinnit naammagisimaarneqarpoq.

Saamerliit partiiat Inuit Ataqatigiit (IA) Inatsisartuni partiit annersarilerpaat, taamalu naalakkersuisunngortitsinissamut periarfissinneqarluni. Tamanna pivoq ukiorpassuarni naalakkersuisuutitaqartut partiiusumasoq Siumut ilumini piffissami sivisuumi aaqqiagiinngissuteqartareersoq.

Kim Kielsen Siumut siulittaasuattut siorna tunuartinneqarpoq, taamaakkaluartoq qinersisoqarnissaata tungaanut Kalaallit Nunaanni Naalakkersuisunut siulittaasuusimavoq.

Suleqatigiinneq ineriartortinneqassasoq

Kalaallit Nunaannut tunngatillugu oqaaseqartartup Martin Lidegaardip (R) siullertut neriuutigaa, naalakkersuisunngortussat patajaannerusumik ingerlatsilerumaartut.

- Danmarkimut tunngatillugu neriuutigaara, suleqatigiinnermik ineriartortitseqataarusuttunik naalakkersuisoqalerumaartoq, taamaalilluta Kalaallit Nunaanni aningaasaliissuteqartartut amerlanerulersissinnaassavavut aamma Danmarkip nunanut allanut sillimaniarnermullu politikkianut sunniuteqarnerulersinnaanissaat anguniarlugu.

- Tassa Kalaallit Nunaat naalagaaffeqatigiinnerup iluani nammineersinnaanerulersillugu, neriuutigaara ukiorpassuarni suli naalagaaffeqatigiissinnaassalluta, taanna oqarpoq.

IA taasisinnaasut 36,6 procentiinik taaguunneqareerluni aamma Inatsisartuni ilaasortat 31-usut akornanni aqqaneq-marlunnik issiatitaqalernermini kikkunnik naalakkersuisooqateqarniarnersoq suli ilisimaneqanngilaq.

IA 2009-miit 2013-imut naalakkersuinikkut akisussaasimasoq Kujataani Kuannersuarni aatsitassanik qaqutigoortunik qalluisoqannginnissaanik qineqqusaaruteqarpoq.

Aatsitassarsiornissamik suliniut inuit ilaannit Kalaallit Nunaata aningaasaqarnikkut iluanaaruteqarfissaatut isigineqartoq, allanit silaannarmut ajoqutaasussasut isigineqarpoq.

- Aningaasaqarnermik ilisimasallit ilisimatuullu allat assigalugit isumaqarpunga, Kalaallit Nunaanni aatsitassarsiornissaq pivallaarnagu aalisarnermik takornariartitsisarnermillu ingerlatsisoqassappat aningaasaqarnikkut angusaqarluartoqarnerussasoq, Martin Lidegaard oqarpoq.

- Tassani pissutigalugu, Kalaallit Nunaanni najugaqarffinni mikinerusuni taama amerlatigisunik aatsitassarsiorfimmi sulisussarsiniarnissap ajornartuunera.

- Taamatut ingerlatsisoqarnissaa isumatusaartutut isigaara, tamannali kalaallit namminneq aalajangingassaraat, taanna oqarpoq.

IA-p politikkikkut suleqataa naammagisimaarinnittoq

SF-ip Kalaallit Nunaannut tunngatillugu oqaaseqartartua Karsten Hønge qinersinerup inereranik aamma naammagisimaarinnippoq.

- Kalaallit Nunaata patajaannerusumik siunnerfeqalernissaa, aamma silap pissusaanik, pinngortitamik, avatangiisinik inuttullu naapertuilluarnermik ukkataqartoqarnissaaq, taanna Twitterikkut allappoq.

Enhedslistenip politikkikkut oqaaseqartartuata Mai Villadsenip maluginiarsimavaa, IA-mit nalunaarutigineqarsimasoq Kalaallit Nunaata Parisimi isumaqatigiissummut ilaatinneqalernissaa, tassani nunarsuarmi silaannaap kissakkiartornera killilersimaarniarlugu gassinik kissatsitsisartunik aniatitsisarnerup annikillisarneqarnissaa pineqarluni.

- Ersoqatigiinnissaq eqqarsaatigalugu, minnerunngitsumillu silap pissusaa pinngortitarlu eqqarsaatigalugit tamanna alloriarneruvoq pingaarutilik, taanna Twitterikkut allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER