IA-p aasaanerani ataatsimiinnera: Siulittaasut tallimat oqalugiartut

Inuit Ataqatigiit ukiunik 45-nik nalliuttorsiorpoq, kommunalbestyrelsini, nunaqarfimmi aqutsisuni, Inatsisartuni aamma Naalakkersuisuni kiisalu siulittaasorisimasatik aasaanerani ataatsimiinnermut qaaqquaat.

Aasaanerani ataatsimiinneq aallartillugu siulittaasuusimasut tamarmik maannalu siulittaasuusoq partii pillugu arfininngornermi ullaap tungaani oqalugiarput.

Partiip siulittaasorisimasaata siulliup aamma pilersitseqataasup, Aqqaluk Lyngep, piffissami 1978-1993-imi siulittaasuusup, attaveqaqatigiinneq pingaaruteqartoq oqalugiarnermini oqaatigaa, kisianni Kalaallit Nunaat tamatuma peqatigisaanik nittartakkatigut sillimaniarnermut piareersimanerusariaqarnerarpaa.

- Partii pilersikkatsigu tv-qanngilaq, qarasaasiaqanngilaq imaluunniit oqarasuaatinik angallattagaqanngilaq. Attaveqaqatigiinneq tamarmi qanermiit qanermut ingerlanneqartarpoq, ullumikkut uagut meeqqavullu qanoq oqarasuaatinik angallattakkanik iPadinillu atuitiginerput eqqumaffiginiartariaqarparput. Attaveqaqatigiinneq ajunngitsumik atoraanni pitsaasuuvoq. Kisianni Kalaallit Nunaata nittartakkatigut sillimaniarnera piareersarneqartariaqartoq nukittorsarneqartariaqartorlu isumaqarpunga, Aqqaluk Lynge oqarpoq.

Amerlanngitsunik innuttaasoqarluni namminiilivinneq

Aqqaluk Lyngep kingorna ukiumi ataatsimi siulittaasuusup Johan Lund Olsenip, nunap namminiilivinnissaanik sulissuteqarnermi inuit pisinnaatitaaffiisa ataqqineqarnissaat oqaatigaa.

Ilaatigut nunat ikinnerusunik innuttaasoqartut ataasiakkaat namminiilivinnermik angusaqarsimasut, taassuma oqariartuutaasa ilagaat.

Aamma Josef ’Tuusi’ Motzfeldt piffissami 1994-2007-imi siulittaasuusoq aamma oqalugiarpoq. Motzfeldtip nunasiaataajunnaarsimaneq aamma Danmarkip Kalaallit Nunaatalu akornanni inuit pisinnaatitaaffiinik arlalinnik unioqqutitsisoqarsimanera oqaaseqarfigai. Partiimilu siuttunut aamma oqariartuuteqarpoq:

- Oqaluttuarisaanermi suliap kusananngitsut pisimagaluartut, taava kingunerisa iluarsiniarlugit iliuuseqartariaqarpugut. Akisussaaffimmik tigusinata allanik tikkuartuiinnarutta, iliuuseqannginnissamut utoqqatsissutipalaatut tamanna isigissavara, Josef ’Tuusi’ Motzfeldt oqarpoq.

Qulequttat ilungersunartut

Apeqqut kinaassutsimut tunngasoq Kuupik V. Kleistimit, 2007-14-imi partiimi siulittaasumit kingoraartaanillu Sara Olsvigimit oqaatigineqarpoq.

Nunarput arlaanni namminiilivinnissamut neriuuteqassappat, Kuupik V. Kleist aamma Naalakkersuisunut oqariartuuteqartut ilagaat:

- Kalaallit Nunaat suliluunniit Issittoq pillugu periusissamik peqanngilaq. Issittumi sumiiffik pillugu periusissaqarata inuuvugut. Naalakkersuisut ataasinngorpat suliartorunik, Issittoq pillugu periusissatta ilusilersorneqarneranik suliaq aallartinnissaata suliassaasa siullersarissagaat isumaqarpunga, tassami pingaaruteqarpoq, taanna oqarpoq.

Ilinniartitaaneq suli pingaartinneqarnerussaaq

Qanga pisimasut oqaluttuarisaanerullu oqaluuserinissai suli pingaaruteqartut, Sara Olsvigip siornatigut siulittaasuusimasunut tunngatinnerlugu oqaatigaa, innuttaasut taamaalillutik inuiaqatigiinni pissutsit paasisinnaaniassagamikkit, siumullu aqqummik nassaarsinnaallutik. Qanga pisimasut qiviarnissaasa saniatigut aamma innuttaasut ilinniartitaanerisa qaffassarnissaannik piumasaqaatitaqarpoq:

- Qaammarsaaneq ilinniartitaanerlu suli annertunerusariaqarpoq. Qanga pisimasut pillugit paasititsiniaaneq, aamma siunissami amerlanerpaat pitsaasumik atugaqarsinnaanissaat pillugu ilinniartitaaneq. Nuna namminersortoq ilinniartitaanikkut qaffasissumik inissisimasariaqarpoq, tamannalu maannamit suli pingaartinneqarnerusariaqarpoq, taanna oqarpoq.

Maanna siulittaasoq, Múte B. Egede, oqalugiarnernik tamanik tusarnaartoq IA-p naalakkersuinermik ingerlatsinera pillugu naatsumik oqalugiarpoq, partiillu politikkikkut anguniagaannik oqaloqatigiissuteqarnissamut piareersimanerarpaa, aasaaneranilu ataatsimiinnermi tamanna siunertarineqarpoq.

Ukiunik 45-nik nalliuttorsiorneq malunnartinniarlugu IA Nuummi arfininngornermi aaqqissuussaqarpoq, sapaammilu tusarnaartitsisoqarpoq.