IA-p aalisarnermut inatsit taama isikkoqartillugu akuerinianngilaa
Aalisarnermut inatsimmut nutaamut nuna tamakkerlugu isumaqatigiissusiortoqarnissaa, Inuit Ataqatigiit qineqqusaarutigissavaat
Aalisarnermut inatsisissamut nutaamut siunnersuutip siullermeerneqarluni ukiaq suliarineqarnerani Inuit Ataqatigiit erseqqissumik oqaatigaat, inuiaqatigiinnut aningaasaqarnikkut sunniutaasussat misissoqqissaarneqarnissaat partiip kissaatigigaat.
- Inatsisip misissorluarneqarani piareersarluarneqaranilu, nunap aningaasaqarnikkut pisinnaasaa qajannarsisissanngikkaa Inuit Ataqatigiit pingaartilluinnarpaat, partiip naalakkersuinikkut oqaaseqartartua taamani oqarpoq.
Nuna tamakkerlugu isumaqatigiinneq
Qinersisoqarnissaanik nalunaaruteqartoqarnerani siunnersuut maanna atorunnaarpoq, IA-lu aalajangiisuussagaluarpat, taanna allanngortinnagu saqqummiunneqaqqissanngilaq.
- Nuna tamakkerlugu aalisarnermut inatsisip isumaqatigiissutigineqarnissaa kissaatigaarput, taamaalilluni politikkikkut siammasinnerpaamik tapersersorneqarniassammat, partiimi siulittaasoq Sara Olsvig Sermitsiaq.AG-mut oqarpoq.
Sara Olsvigip kingunissat suli allat misissorneqarnerinik amigaateqarluni tikkuarpaa, aalisarnerup piujuarnissaa ersarinnerusumik naqissuserneqarnissaa kiisalu aalisarnermut siunnersuisoatigiit ilanngunneqarnissaat pisussaatinneqarnissaa.
- Aalisarnermik suliaqartut issiaqatigalugu inatsit oqaluuserinissaanik tamanna isumaqarpoq. Inuussutissarsiortut inatsimmi nutaami imminnut takusinnaanissaat pingaaruteqarpoq.
Allannguisoqassasoq
Inuussutissarsiuteqartut, Sulisitsisunit aamma KNAPK-mit sinniisoqartut ukiap ingerlanerani aalisarnermut inatsimmut akerliullutik tapersersortissarsioqattaarput. Ingammik pisassiissutit utertissinnarlugit allanut agguaanneqarnissaat tassani pineqarsimapput.
- Siunnersuut taama isikkoqartillugu akuerinianngikkissi, taamatut oqariartuuteqarnersi isumaqarpa?
- Tassani allanngugassaqarpugut, Sara Olsvig (IA) oqarpoq.