Skip to main content

IA-p aalisarneq pillugu inatsimmut matoqqasoqarnera uparuarpaa

Sara Olsvig isumaqarpoq Naalakkersuisut inuiaqatigiit isumaqatigiissutigisaannik aalisarnermut inatsisiliornissamut neriorsuutsik atuutsinngittuuleraat.

IA-p siulittaasua Sara Olsvig Naalakkersuisunut kaammattuuteqarpoq partiit erngertumik aalisarnermut inatsisissaq pillugu isumaqatiginiarlugit aggersassangaat.

Erseqqissumik kaammattuuteqassaagut; isumaqatiginninniarnernut piaartumik qaaqqusisoqarniarli, ataatsimoorluta inuussutissarsiuterput pingaarnerpaaq tunngavilersorluarsinnaaniassagatsigu, tusagassiuutinut nalunaaruteqarluni taama allappoq.

Sara Olsvig (IA) §37 naapertorlugu apeqqumminut aalisarnermut, piniarnermut nunalerinermullu naalakkersuisumit, Erik Jensenimit (S), akissutigineqartunut naammaginninngilluinnarpoq.

Iluminni suliassaq

Akissuteqarlunimi allappoq inatsisissaq maanna iluminni suliassaangallartutut suli isigigini.

- Aalisarnermut, Piniarnermut Nunalerinermullu
Naalakkersuisoqarfik qinnuigaara inatsisissatut siunnersuummik piaartumik suliaqaqqullugit. Tamanna tunniunneqarsimatinnagu inatsisissatut siunnersuut Naalakkersuisut iluminni suliassaattut isigineqassaaq, taama akissuteqarpoq.

Tamannalu Inuit Ataqatigiit siulittaasuata naalakkersuisup Sermitsiaq.AG-mut siusinnerusukkut oqaatigisimasaanut ilaatigut imaattunut ‘Nuna tamakkerlugu aalisarnermut inatsisip isumaqatigiissutigineqarnissaa anguniagaavoq,  aammalu ‘Aammattaaq Inatsisartuni illuatungiliuttunik isumaqatiginninniaqateqassaanga, inatsit sapinngisaq tamaat siammasissumik tunuliaquteqartinniarsaralugu’  naapertuussorinngilai.

Erik Jensen akissuteqaammini nangilluni allappoq ‘partiit susassaqartullu allat’ peqataatikkumaarlugit Naalakkersuisut inatsisissatut siunnersuut akuerippassuk.

Tamannali naammanngitsoq Sara Olsvig (IA) isumaqarpoq.

- Naalakkersuisut siamasissumik isumaqatigiissuteqartoqarnissaa kissaatigisimappassuk maannakkut, inatsisissatut siunnersuummi sammiviit pingaarnerit inissisiterneqannginneranni, partiit peqataatittariaqarpaat. Inuit Ataqatigiinnit piareersimavugut. Naatsorsuutigaarput siorna ukiaanerani inatsisissatut siunnersuutaagaluarsimasumik siullermeerinninnermi iluatsitsinngitsoorsimaneq ilinniarfigisimallugu partiinik isumaqatiginninniavinnissaq uatsituulli Naalakkersuisut pingaartitsigissagaat.

- Aalisarnermut inatsit kingunerisaalu nunatta aningaasaqarneranut sunniuteqarluinnartuupput. Naalakkersuisut isertukulukkunnaarlutik qanoq aalisarnermut politikkeqarnerlutik oqaluttuartariaqarlerput. Isumaqatiginninniavinnernut appakaattariaqalerpugut, suliassarmi aningaasarsiornitsinnut maannamut pingaarnertut inissisimavoq siunissamilu aamma aningaasarsiutaalluarnissaa qulakkeertariaqarparput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER