IA: Ole Dorph tunuarit

Borgmester Ole Dorph isumaqarunit piffissaq tamakkerlugu borgmesteriusinnaanaani, taava Inuit Ataqatigiinniit kaammattorparput borgmesteritut tunuarniuteqaqqullugu, Qaasuitsup kommuniani kommunalbestyrelsimi ilaasortaq Bendt B. Kristiansen, tusagassiuutinut 14. oktober allappoq, Qaasuitsumi Inuit Ataqatigiit sinnerlugit.

Ilimanami ataatsimiittarfiliornissamik Realdania-p pilersaarutaa innuttaasunut saqqummiunneqarmat Ole Dorph-ip ´inuinnartut´peqataalluni oqariartuuteqarsimanera Qaasuitsup kommuniani Inuit Ataqatigiit qisuariarfigaat.

Inuit Ataqatigiit isumaqarput aningaasaqarnermut ataatsimiititaliami politikikkut suliakkiussat siulittaasutut illuatungilerlugit sulisussaanngitsoq.

Tunuarnianngilaq

- Uanga tunualersaanngilanga politikkikkut oqallissaagaluaqisoq, aamma oqallinneq ajunngilaq. Qaasuitsup kommuniani politikkikkut suliassaqaqaagut, suliassakka ingerlatissavakka, Ole Dorph oqarpoq.

Taanna oqarpoq Qaasuitsup Kommunia suleqatigalugu politikkikkut sulinini ingerlaqqissasoq.

- Ilumullimi soqutigisakka tassaniittut ingerlassimagaluarukkit nipangiinnarlunga iluariinnarsimassagaluarpara, World of Greenlandimi piginneqataassutima nalingi qaffariassammata, kisiannni uanga aningaasat pinngilakka, Ole Dorph oqarpoq

- Uani pivakka nunaqavissut, minnerungitsumik Ilimanarmiut, pilersaarummut taama annertutigisumut peqataatinneqarnissaasa angunissaa. Oqanngisaannarpunga, pilersaarut akerleralugu isumaqarpungali torrallataasoq siunissamut ungasissumut isigisoq. Nunaqavissut piginnittuunissaat, minnerunngitsumik Ilimanarmiut piginnittuunissaat uanga assut kissaatigigaluaqaara, Ole Dorph oqarpoq.