IA: Naalakkersuisut suliassatik saperpaat

Paragraf 37 naapertorlugu apeqqutit arlallit Naalakkersuisut akisinnaasimanngilaat, soorluttaaq Inatsisartut Inatsisinut Ataatsimiititaliaannik isumasioqatigiikkasuarnissamut piffissaqarsimanngitsut.
– Decembari aallartimmalli inatsisitigut ataataqanngitsut pillugit paragraf 37 naapertorlugu arlalinnik apeqquteqarpunga. Apeqqutit suli akineqarsimanngillat, soorluttaaq Naalakkersuisut isumasioqatigiikkasuarnissamut piffissaqarsimanngitsut, uanga tamanna Inatsisinut ataatsimiititaliaq aqqutigalugu perusussimagaluarakku Siulittaasup naalakkersuisoqarfianut decembarip 10-anni saaffiginninnerup kingorna. Naammaginanngilaq Inatsisartut saaffiginnissutaat Naalakkersuisut naammassisinnaanngimmatigit, Sara Olsvig tusagassiorfinnut nalunaarutikkut allappoq.
Taanna isumaqarpoq tamanna ´inatsisitigut ataataqanngitsunut´ suliassami pitsaanngitsumik sunniuteqassasoq.
– ´Inatsisitigut ataataqanngitsunik´ taaneqartut pillugit inatsit nutaaq ilisimaneqartutut Inatsisartut ukiakkut ataatsimiinneranni suliarineqarpoq. Qallunaat naalakkersuisuisa inatsimmut missingersuutaannut allannguutissatut siunnersuut isumaqatigiilluni akuersissutigineqarpoq. Allannguutissatut siunnersuut imaqarpoq inassuteqaammik, tassa qallunaat naalagaaffiat inatsisitigut ataataqanngitsunut, kingornussisinnaanngitsutut, taarsiissuteqassasoq.
Oqaloqatigiittoqanngilaq
Sara Olsvigip tupigusuutiginngilaa qallunaat naalakkersuisui inassuteqaammut akuersaannginnerat.
– Nalunartoqarporlu folketingimi partiit Inatsisartut allannguutissatut siunnersuutaat akueriumaaraat. Suliassarli naammassisutut isiginngilara. Tassami Kalaallit Nunaannut Ataatsimiititaliap tamanna pillugu isumaliutersuunni suli tunniutinngilaa. Taamaattumik pingaaruteqaraluarpoq Naalakkersuisut qanimut oqaloqatiginninnissaat ersarissumillu akissuteqarnissaat, Sara Olsvig allappoq.
Aamma atuaruk: Aleqa dronningimi ilassinnippoq
Aamma atuaruk: Ataataqanngitsunut taarsiissuteqarnissaq Thorningip itigartippaa
Aamma atuaruk: Qinersisartut qinerseqqusipput
Taanna isumaqarpoq pissusissamisuussagaluartoq suliassaq Inatsisartut inatsisinut ataatsimiititaliaani oqaloqatigiissutigineqarsimasuuppat.
– Maannali Naalakkersuisut siulittaasuat Kalaallit Nunaanni aallarsimavoq Inatsisartut inatsisinut ataatsimiititaliaat oqaloqatiginagu sulilu paragraf 37 naapertorlugu apeqqutit akissuteqarfiginagit. Pissusissamisuussagaluarpoq Inatsisartut inatsisinut ataatsimiititaliaannik oqaloqatigiissutigissallugu Kalaallit Nunaat taarsiissuteqarnissamut sorpianik piumasaqassanersoq, Naalakkersuisut siulittaasuata ministeriunermik ataatsimeeqateqannginnerani, Sara Olsvig oqarpoq.
– Ajuusaarnartorujussuuvoq takoqqillkugu Naalakkersuisut siulittaasuata inatsisartoqarneq tunulliummagu Inatsisartunullu akisussaassuseqarnerminut malittarisassat nalinginnaasut malinnagit. Ajoraluartumik ersarippoq aalassassimaartoqarpallaartoq Naalakkersuisut siulittaasuata iluamik ingerlatsinissaanut. Naammanngitsumik naalakkersuinermik ingerlatsineq kimulluunniit iluaqutaanngilaq, Sara Olsvig oqarpoq.