IA Naalakkersuisoqatigiinnik ullumi saqqummiussissaaq
IA naalakkersuisoqatigiinnermut isumaqatigiissummik tallimanngornermi ualikkut saqqummiussissaaq, taamatullu Naalakkersuisussanik innersuussinerminik aamma saqqummiussaqassalluni. Tamanna pissaaq Nuummi Katuami. Pisut Sermitsiaq.AG-mi malinnaavigisinnaavatit.
Qinigaaffimmi aggersumi kikkut nunamik aqutsissanersut pillugit sapaatip akunnerata kingulliup ingerlanerani pissanngatigineqarsimasut, tallimanngornermi ualikkut saqqummiunneqartussanngorput.
Saqqummiineq nalliuttorsiorpalaartumik ingerlanneqassaaq, qilaatersortoqassalluni aamma erinarsortoqassalluni. Nalliuttorsiorpalaarneq Nuummi Katuami nalunaaqutaq 16.15 aallartissaaq, akunnerullu ataatsip missaani sivisussuseqassalluni.
Múte B. Egede naalakkersuisoqatigiit isumaqatigiissutaata atsiornerata saniatigut kikkut Naalakkersuisuulerumaarnersut pillugit saqqummiussaqassaaq.
Innersuunneqartut Inatsisartut inissititerlutik ataatsimiinneranni, 23. april aallartittussami akuerineqaqqaartussaapput.
Qitiusumik sammisassat saqqummiunneqassapput
Isumaqatigiissutip imarisaa pingaartitassallu naalakkersuisoqatigiilersussat isumaqatigiissutigisaat saqqummiunneqassapput.
IA ilisimatitsivoq pisussaq tamanut ammasoq, Covid-19-imulli killilersuutit malinneqarnissaanik eqqaasitsilluni.
Demokraatit aamma Siumut isumaqatiginninniarnernit peqataajunnaareerput, taamaammat naalakkersuisoqatigiilersussat tassaassagunarput Inuit Ataqatigiit aamma Naleraq, kiisalu Atassut peqataatinneqassagunarluni. IA qinersinermi aqqaneq-marlunnik isertitaqarpoq, Nalerarlu kisiat naalakkersuisoqatigilerpagu ikinnerpaanik amerlanerussuteqarneq anguneqassaaq, taamaattoq Atassut peqataassappat amerlanerussuteqartut 18-iulissapput.
Periarfissaq alla tassaavoq Naleqqamut naalakkersuisoqateqarneq, Atassullu partii tapersersuisutut inissilluni. Qinigaaffimmi kingullermi Demokraatit taama inissisimasimapput.