IA-mi siulittaasunngortoq: Kim Kielsen ataatsimoorluta ajugaaffigisinnaavarput
Inuit Ataqatigiit pissaanermik tigusinissamut piareeqqasoq partiimi siulittaasunngortoq oqapoq
- Maniguuppunga kisianni aamma tulluusimaarpunga Inuit Ataqatigiinni siulittaasussatut tunualiaqutserneqarama.
Inuit Ataqatigiinni unammillerteqarnani siulittaasunngortoq Múte Bourup Egede Sermitsiaq.AG-mut oqarpoq.
- Sulerusussuseqarneq aammalu tunuliaquserneqarluarnerma pissutigisaanik nukimmik annertoorujussuarmik peqarlunga misigisimavunga. Parteeqatikka peqatigalugit inuiaqatigiinni siunissamut qaamasumut alloriartitsinissamut siuttuunissatsinnut misigisimavinga, oqarpoq.
- Inuit Ataqatigiit ataatsimoortumik aamma peqataatitsiffiusumik ingerlatsinermik annertuumik, suli ullumimiit annertunermik, ingerlatsissaagut. Politikkitsinnik ersarissaanerussaagut. Inuussutissarsiornermi politikki ersarinnerulissaaq, tassani sulisartut ataavartumik suliffeqarnissaat qulakkeerneqassaaq, aammalu inuiaat imminnut napatittut, taamaalilluni nuna imminut napatittoq namminersulivinnissamut toqqammaveqassaaq.
- Kim Kielsen ajugaaffigisinnaaviuk?
- Inuit Ataqatigiit piareersimapput aamma uanga piareersimavunga akisussaaffimmik annertunerpaamik tigusinissatsinnut, Múte Bourup Egede oqarpoq.