IA-mi siulittaasoq: Kina upperissavarput?IA-mi siulittaasoq
Kim Kielsen siulittaasunngorniunnermi Erik Jensenimut ajorsareersoq, kina nunatsinni politikkikkut aquttuunersoq pillugu oqattoqarneranut IA-mi siulittaasoq Múte B. Egede akuliuppoq.
Naalakkersuisut inuit pisinnaatitaaffiinik suliaqartut siunnersuisoqatigiit illersuisutullu pilersinneqarsimasut ataatsimoortinneqalernissaannik pilersaaruteqarnerat Siumumi siulittaasunngorlaamit Erik Jensenimit akerlilerneqarpoq, taamannalu Múte B. Egedep ”tukattumik suliarineqarnerarpaa”.
- Taamatut suleriaaseq ittoq pineqartuni nalornisitsilersimanissaa qularutiginngilarput. Tamannalu uggornaqaaq. Aningaasanut Inatsisikkut aningaaliissutigineqartut iluanni inatsisitigullu aalajangersakkkat naapertorlugit pineqartut sapinngisannguaminnik sulinermikkut ineriartortitsisimapput, fastslår IA-mi siulittaasoq tusagassiorfinnut nalunaaruteqarluni erseqqissaavoq.
Taassuma annilaanngatigaa, inuiaqatigiinni sanngiinnerpaanik sullissinerup ajortumik kinguneqarsinnaanera.
Suliaq aallaqqaataaneeqqittariaqartoq
- Naalakkersuisut ataatsimoortitsiniarnermut suliaqarnerminni torrallaanngillat. Suliaq aallaqqaataaneeqqittariaqarpoq. Naalakkersuisoqatigiinni siuttuusup partiiminni isumaqatigiissutigisariaqarpaat maannakkut Naalakkersuisoqatigiit ataatsimoortitsinissamik siunertaqarnerat upperissaneripput, imaluunniit partii Siumumut siulittaasunngorlaaq Erik Jensen upperissaneripput, taannami oqarmat taamatut siunertalimmik suliniuteqarneq nammineq peqataaffiginianngikkini, Múte B. Egede nunami partiit illuatungiliuttut annersaanni siulittaasoq oqarpoq.
Taanna isumaqarpoq, Siumumi siulittaasuusimasup maannalu siulittaasup isumaqatigiinnginnerisa kinguneranik ataatsimoortitsiniarneq pillugu tusarniaaneq maanna ingerlalereersoq unitsikkallarneqartariaqartoq.
- Inuit pisinnaatitaaffiinik suliaqartut siunnersuisoqatigiit illersuisutullu pilersinneqarsimasut ataatsimut inissinneqarnissaannik eqqarsaat siunertaqarluarsinnaammat Inuit Ataqatigiinniit itigartivinngilarput. Tamatumali piviusunngortinnissaanut siunnersuisoqatigiit illersuisutullu pilersinneqarsimasut uani pineqartut aallaqqaataaniit qanimut suleqatigineqassapput. Aamma suleqatigineqassapput Inatsisartut. Inatsisartummi taakkuupput siunnersuisoqatigiit illersuisutullu pilersinneqarsimasut pillugit inatsisinik pilersinneqarsimasunik allannguisoqassappat aalajangiisussat, understreger IA-mi siulittaasoq erseqqissaavoq.
Illersuisoq: Sipaarniarnerinnaavoq
Naalakkersuisut siunnersuutaat innarluutillit illersuisuannit Christian Johnsenimit "sipaarniarnerinnaanerarneqarpoq", taannami isumaqarpoq sanngiinnerpaanik sullissineq ajorseriartinneqassasoq.
Inatsisissat siunnersuut juulli sioqqullugu 2021-mi februaarip aallaqqaataata tungaanut atuuttussamik tusarniaassutigineqalerpoq, Naalakkersuisullu naatsorsuutigaa siunnersuut Inatsisartut ukioq manna ukiakkut ataatsimiinneranni suliarineqassasoq.
Siunnersuummi qitiusoq tassaavoq, meeqqat, inuit innarluutillit utoqqaallu illersuisuisa kiisalu naligiissitaanissamut siunnersuisoqatigiinni Kalaallillu Nunaanni inuit pisinnaatitaaffiinut siunnersuisoqatigiinni siulittaasut kommissionimut ataatsimoortinneqarnissaat. Siuttutut ingerlatsisut kommissæritut ingerlaannassapput, ukiullu sisamakkuutaarlugit ilaasortassanik nutaanik toqqaasoqartassalluni.