IA-mi siulittaasoq: Inatsisartunut qinersisoqarli
Nunatsinni partiit anginerit pingasut, Siumut, Inuit Ataqatigiit aamma Demokraatit 2018-mi Inatsisartunut qinersinerup kingorna tamarmik ataatsimeersuareerlutik nutaanik siulittaasortaarlutillu siulersuisortaarnikuupput.
IA-p siulittaasua, Múte Bourup Egede isumaqarpoq piffissanngortoq innuttaasut qinersinermikkut isumasiorneqartariaqartut, taamaalillunilu qinigaaffimmi matumani politikkikkut attanneqarsinnaanngitsumik inissisimaneq qaangerneqarsinnaaniassammat.
Aviisi Sermitsiaq allappoq.
Ilisimaneqalereersutut Siumup siulersuisortaavi maanna juullimut atatillugu sulinngiffeqarput utaqqiisaalu partiip siulersuisorisimasaa siulittaasutut ingerlaqqinngitsoortoq Kim Kielsen naalakkersuisooqataasalu nunatta soqutigisai ingerlappaat.
Sermitsiamit paasiniaraluarparput siulittaasunngorlaap Erik Jensen-ip aammalu siulittaasutut tunuartup sulili naalakkersuisut siulittaasorisaata Kim Kielsen-ip akornanni qanoq isumaqatigiittoqarsimanersoq, tassami isumaqatigiissuteqartoqarsimanissaa naatsorsuutigineqartariaqarmat, siulittaasunngortormi unammilliinnarsinnaanngilaq ajugaariarlunilu sulinngiffeqarnissani salliullugu, massa nuna tunngavimmigut sajuppiluttoq, pingaartumik piffissami matumani nunarsuaq tamakkerlugu covid-19-mik tuniluunnersuaqarnerup nalaani, nunarpullu ulloq unnuarlu peqqinnissakkut innuttaasut suleqataalluarnerisigut iluatsitsisimaarfiusimagaluartoq ajutooriaannaalluni aarlerinartorsiornerup nalaani, minnerunngitsumillu aamma tuniluunnersuup kingunerisaanik aningaasaqarnikkut qajannartumik inissisimasoqartillugu.
Juullereerpat ataatsimiinnerit
Taamaattorli paasisassarsiornitsinni Jensen-imit susaavinngilagut, taassumami naqissuseqqippaa Siumup aqutsisortaavi juullimi sulinngiffeqartut kingumullu innersuussutigaa Inatsisartut ukiaanerani ataatsimeeqqammersut aammalu tamatuma kinguninngua Siumut ataatsimeersuaqqammertoq, taamaammallu juullimut atatillugu nalliuttorsuit tamarmik qaangiutereerpata aatsaat siulersuisuuninngortut politikkikkut sulinertik nangikkumaataat:
- Massakkumuugallartoq susoqassanersoq susoqassannginnersorluunniit annerusumik oqaaseqarsinnaanngilagut, siulersuisuunerit ukiortaap kingorna (nalliuttut qaangiutereerpata) aatsaat ataatsimiinnitit nangeqqittussaammatikkit, Siumup siulittaasortaava Erik Jensen erseqqissaavoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: