IA-mi politikkeri: Angallassinissamut isumaqatigiissut inuunermik navianartorsiortitsisinnaasoq

Kommune Kujallermi kommunalbestyrelsimi ilaasortap Avaaraq Olsenip Inuit Ataqatigiinneersup angallassinissamut isumaqatigiissutip nutaap 2015-mi atulersussap kinguneqarnerlunnissaa ernumagaa. Angallassinissamik isumaqatigiissummi qulimiguullit atorneqarunnaassapput, taakkununnga taarsiullugit angallatit atorneqalissapput. Kujataani Air Greenlandimi sulisorineqartut 22-t soraarsinneqarput.

- Naalakkersuisut Kujataa sumiginnarujussuarpaat, tamannalu tupaallaatigeqaara. Naalakkersuisugut qineqqusaarutigaat sineriak tamaat ineriartortinneqassasoq taamaakkaluartorli akuersaarput illoqarfimmiit illoqarfimmut silaannakkut angalasinnaanerput unitsinneqarnissaanut, Avaaraq Olsen tusagassiutinut nalunaaruteqarpoq.

Kujataani upernaami immami sikuaraqartorujusussuusarpoq immakkut angallaviusinnaanngitsumik. Avaaraq Olsenip tamanna kingunerlussinnaanera ernumagaa

- Kingullertigut angallannikkut alianartunik pisoqallattaarpoq. Qulimiguut atorpiarneqassanngippata takorloorsinnaava umiatsiarsornermi navianartorsiornerit amerlatsissasut. Ajutoornerit ajunaarnerillu amerlatseriarsinnaapput. Inuit amerlavallaartut angallassinissamut akuerisaanngitsunut angalaniartalissapput, Avaaraq Olsen oqarpoq.

Ilinniagaqarsimasut Kommune Kujallermit aallarnissaat ernumassutigaa. Air Greenlandimik angallassinissamik isumaqatigiissuteqarunnaarneq Naalakkersuisut isumaliutigisaanngitsumik iliuuseqartut.

Angallassisarnerit qanoq isikkoqalissanersut Naalakkersuisunit kingusinnerusukkut saqqummiunneqarumaarpoq.