IA-mi ilaasortaq: Meeqqat atuarfii siorasaangassaanngillat

Meeqqat atuarfii angusarissaanngippata Naalakkersuisut kommuninut tapiissutit ikilisissinnaalerumavaat. Taama nalunaaruteqarneq Inuit Ataqatigiinniit Sofia Geislerip paasisinnaanngilaa.

Aningaasaqarnermut Naalakkersuisoq, Vittus Qujaukitsoq (NQ) qaammammi uani nalunaarutigaa Naalakkersuisut suleriusiliussasut, meeqqat atuarfii angusaat naammaginanngippata Namminersorlutik Oqartussaniit kommuninut tapit ikilisissinnaasunngorlugit.

IA-mit kultooreqarnermut, ilinniartitaanermut ilageeqarnermullu Inatsisartuni ataatsimiititaliami ilaasortap, Sofia Geislerip, nalunaaruteqarneq akerlilerpaa.

Meeqqat atuarfiini unammilligassat

- Meeqqat pineqarput, taakkunanngalu atuartitsineq ilikkartitsinissarlu pineqarpoq. Namminersorlutik Oqartussat suliffeqarfiutaasa ilaasa kiffartuussinissamik isumaqatigiissutit tunngavigalugit suliassaminnik isumaginnittarnissaannik aaqqiinertuut meeqqat atuartitaanerat nalilersorneqarsinnaanngisaannassaaq. Ilinniartitsisut tatineqartussaanngillat aningaasanik annaasaqarnissaq ernummatigiinnarlugu meeqqat karakterigissaarnissaat anguniartussanngorlugu, tusagassiutinut nalunaarutimini erseqqissaavoq.

Illuatungaanik siunnersuutigaa partiit 'meeqqat atuarfiata qanoq ittumik pitsaassuseqartoq naatsorsuutiginerlutigu kissaatiginerlutigulu oqallisigissagaat’.

Qanga pisimasuupput

- Qinikkatullu akisussaaffipput taamaasilluta takutillugu. Taamaammat ukiaanerani Inatsisartut ataatsimiinnissaannut siunnersuutigaara oqallisigissagipput.

- Taamaattumik neriuutigaara suli ukkatarissagipput meeqqat atuarfiata nukittorsarneqarnissaa. Meeqqat atuarfiat tassaasussaanngilaq angusarissaanngikkuni aningaasaliiffigineqarnikkut ikilisaaffigineqarnissaminik ernumajuaannartoq. Kaammattuinermik taallugu taamatut siunertaliineq qanga periuutsinut atorunnaareersunut sanillersuunneqarsinnaavoq, Sofia Geisler nalunaaruteqarpoq.

Powered by Labrador CMS