IA-mi avissaartuunneq: Uju borgmesterimut akerliusoq
Kommuneqarfik Sermersuumi borgmesteri Charlotte Ludvigsen (IA) akunnittarfissualiornissaq pillugu pilersaaruteqartoqarneranik nuannaarutiginnittoq, borgmesterip tulli Uju Petersen (IA) akerliuvoq.
Nuup nuutoqartaani akisuumik akunnittarfiliornissamik pilersaaruteqartoqarnera assigiinngitsutigut isumaqarfigineqannguatsiarpoq.
Inuit Ataqatigiinni aamma isumaqatigiinngittoqarpoq, borgmesterinngorniunnikummi marluullutik pilersaarummut tunngatillugut isumaqatigiinngilluinnarput. Borgmesterimmi tulliata Uju Petersenip borgmester Charlotte Ludvigsenip pilersaarummik nuannarinninnera peqataaffigiuminaatsippaa.
- Kommunalbestyrelsimi nuutoqqami aqqusernup biilinik angallaffittut matuneqarnissaa siunnersuutiginikuuara akuerineqarlungalu, taamaammat nuutoqqami taassumaluunniit eqqaani akunnittarfiliortoqarnissaa akuerisinnaanngilara. Nuutoqqap allanngortinneqarnissaanik pilersaaruteqartoqanngilaq, aamma nuutoqaq eqqissisimatitaavoq, tusagassiorfinnut nalunaaruteqarnermini oqarpoq.
Borgmesterip tullia, makitsinerinnakkut borgmesterinngunngitsoortoq oqaluttuarpoq, akunnittarfiliornissamik pilersaarutip tusarniaassutigineqarnissaanut akuersaarsimalluni, imaanngitsorli sananeqarnissaanut isumaqataasoqartoq, naqissuserlugu erseqqissaavoq.
Nunat allat Kalaallit Nunaannik soqutiginnikkiartuinnarnerat tikilluqquaa, peqatigitilluguli erseqqissaatigalugu, neriuuteqarluarlunili ingerlatsinermi innuttaasut puigorneqannginnissaat.
- Isumaqarpunga, siullertut kommunitsinni takornariartitsisarnerup qanoq ineriartortinneqarsinnaanera takornariallu qanoq nunatsinnukarusutsilersinnaanerat misissortariaqaripput, Uju Petersen oqarpoq.
- Illoqarfimmut pilersaarummi nutaanik suliniuteqartoqaraluartoq tamatumanngalu inerisaasoqaraluartoq suliassarujussuarmik tamatta suli kivitassaqarpugut, tassalu najukkami innuttaasut minnerunngitsumik atugaannik pitsanngorsaanissaq, taamaammat najukkani innuttaasut suleqatigalugit eqqarsarsarluarlutalu innuttaasut ineriartortitsinerlu salliutitsigit.
Atsiornerit 1100-t
Innuttaasut 100-ngajaat Uju Petersenimut isumaqataapput, akunnittarfissarsuullu akisuup inissisimaffissaanut akerliulluni atsiortitsinermut atsioqataasimallutik, nittartakkami skrivunder.net-imi tamanna takuneqarsinnaavoq.
Suliaq kommunalbestyrelsimi kingullermik sammineqarmat tusarniaassutigineqarnissaanut Siumukkormiut kisimik akerliusimapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...