eqqumiitsuliortut

IA-meersoq: Tapiissuteqarneq Nunatsinni eqqumiitsuliornermut nukittorsaataassaaq

Inuit Ataqatigiit Inatsisartuni ilaasortaatitaata Peter Olsenip, Nunatsinni eqqumiitsuliortut arlallit aningaasaliiffigineqarnerat, nuannaarutigaa.

Peter Olsen, IA

- Ukiuni kingullerni eqqumiitsuliornikkut annerusumik timersornikkullu aningaasaliisoqartarsimanngikkaluartoq, Inuit Ataqatigiit kissaateqarnitsigut aappaagu 2018-mut aningaasanut inatsimmut aatsaat taamak amerlatigisunik immikkut ittumik nipilersorneq, isiginnaartitsineq, filmiliorneq, atuakkiorneq kiisalu timersorneq aningaasaliiffigineqarput.

IA-meersoq Peter Olsen tusagassiuutinut nalunaarummi allappoq.

Aningaasanut inatsimmi inissaqartitsinissarput aatsaat taamak pingaaruteqartigilersimavoq, taanna erseqqissaavoq.

- Eqqumiitsuliornerullu inuussutissarsiutitut, avammut nittarsaassisutut tunisassiassatullu tulluussariartuaalernerani alloriarneq una pingaartilluinnarparput. Isumaginninnikkut unammilligassaqaleruttorfitta nalaani, timikkut tarnikkullu nukittorsaanissaq aatsaat taamak pingaaruteqartigilersimavoq, minnerunngitsumillu tamatumunnga aningaasanut inatsimmi inissaqartitsinissarput aatsaat taamak pingaaruteqartigilersimavoq, taanna oqarpoq.

Aningaasaliissutit imatut agguataarneqarput:

- Nunatta Isiginnaartitsisarfianut tapiissutit 3.mio.kr-.nik ilaqqippagut aammalu Isiginnaartitsisartunit ataasiakkaanit imaluunniit isiginnaartitsisartoqatigiinniit qinnuteqarfigineqarsinnaasunik immikkut 1.mio.kr.-nik aningaasaliissuteqarpugut. Filmiliortartut atugaannut pitsanngorsaanissamut, filmværstedimillu pilersitsinissamut 1.mio.kr.-nik aningaasaliissuteqarpugut.
Atuakkiortunut atuakkiallu saqqummersinnissaannut tapiissutit 500.000 kr-imik qaffappagut, taanna erseqqissaavoq.

- Kiisalu nunanut allanut unammisartut aningaasarsiassaraluaminnik annaasaqarnerminnut taarsiivigineqarnissamut matussutissatut aningaasaliissutaasartut 250.000.kr-usut, 1.mio.kr.-nut qaffallutigit, tusagassiuutinut nalunaarummi oqaatigineqarpoq.

Powered by Labrador CMS