kommunimut qinersineq

IA-meersoq Nivi Olsenimut: Salluvutit

- Ilinniarnermut naalakkersuisutut kollegialiortitsinissamut 300 millionit koruuninik immikkoortitsisimalluni oqarami salluvoq, 2016-imi 3 millionit koruuniinnaat immikkoortinneqarmata, Sermersuumi kommunimut qinersinermi sassartoq, Nick Nielsen (IA) oqarpoq

Nick Nielsen, naalakkersuisoq for uddannelse
- Nivi Olsen qinersisartunut salluvoq, Nick Nielsen (IA) oqarpoq

Kommuneqarfik Sermersuumi qinersisartunut Nivi Olsen salluvoq.

Kommunimi tassani kommunimut qinigassanngortittoq, Nick Nielsen (IA) taama oqarpoq.

Tassami taanna naapertorlugu ilinniarnermut naalakkersuisuusimasoq, Nivi Olsen (D), Ilisimatusarfimmi pingasunngornermi qinersisartunik ataatsimiititsisoqarnerani nuna tamakkerlugu kollegialiortitsinissamut naalakkersuisuugallarami 300 millionit koruuninik immikkoortitsisimalluni oqarpoq.

Nick Nielsen: Kisitsisit silaannarmit tigusaapput
- Uanga naalakkersuisoqarfiup aningaasameerneranut ilisimasakka naapertorlugit Nivi Olsenip qaqqaqalaarutai ilumoornersut misissuiffigipallappakka – aningaasanut inatsit aqqutigalugu. Kisitsisilu aningaasami inatsisini atuarneqarsinnaasut uppernarsisippaat Nivi Olsen, kisitsisinik silaannarmik tigusilluni asuli tusaqqusaarsimasoq, Nick Nielsen tusagassiuutinut nalunaarummi allappoq.

2016-imi 3 millionit koruuninik 300 millionit koruuniniunngitsoq ilinniartitaanermut immikkoortitsisoqarsimasoq, Nick Nielsen erseqqissaavoq.

- Aningaasallu 2014-mut aamma 2015-imut, tamarmik immikkut 23 mio. kr. katikkaluaraanniluunniit, 2016-mut 3 mio. kr. ilanngullugit, qaavinullu 2017-imut 20 mio. kr.-nit ilillugit, katillugi 69 mio. koruuniupput, ukiuni sisamani atorneqartussat – oqaatigineqartunut 300 mio. kr-mit palleqqajarsimanagit, Nick Nielsen oqarpoq.

Kisitsisit eqqunngitsut
Nick Nielsenip taamaattumik Nivi Olsen apeqquserpaa.

- Kisitsisit taakku qineqqusaarnerup nalaani naqqinneqanngillat Nivi Olsenimit imaluunniit Demokraatit siulittaasuannit Randi V. Evaldsenimit, aamma kommunimut qineqqusaartumit, piffissallu ilaani aningaasaqarnermut naalakkersuisuutsiartumit.

- Taamaattumik ima inernilertariaqarpoq Nivi Olsenip qinersisartut piaaraluni kisitsisinik eqqunngitsunik saqqummiussiffigigai. Isumagalu malillugu taamaasiorneq kommunalbestyrelsimut qineqqusaartumut naalakkersuisuusimasumulluunniit ataqqinassusilittut iliornerunngilaq, Nick Nielsen oqarpoq.

Powered by Labrador CMS