kommuninut qinersineq 2017
IA Kommune Kujallermi isumaqatiginninniarunnaarpoq
Kommune Kujallermi Inuit Ataqatigiit Siumumik isumaqatiginninniaqateqarnerit qimappaat. Tamatumunnga tunuliaqutaasoq partiip itisiliiffigerusunngilaa
Nunatsinni kommunini kujasinnerpaami Inuit Ataqatigiit pissaanermut isumaqatiginninniaqataajunnaarput.
Partiimit tusagassiuutinut nalunaarummi naatsumi tamanna atuarneqarsinnaavoq.
- Inuit Ataqatigiit Kommunemi Kujallermi, marloriarluta Siumumik ataatimeeqateqareerluta aalajangerpugut isumaqatiginninniarnerit qimanniarlugit. Ukiuni tulliuttuni sisamani illua tungiliuttuussaagut.
Isumaqatiginninniarunnaarnerup tunuliaqutaa partiip ilisimatitsissutigerusunngilaa.
- Isumaqatiginninniarnerit sooq taamaatissimanerlugit maanna oqaaseqarusunngilanga, partiip siuttutut qinigassanngortitaa Stine Egede, Sermitsiaq.AG-mut oqarpoq.
Siumut amerlanerussuteqarluarpoq, inissanit 15-iusunit qulingiluanik qinigaatitaqaramik, taamaalillutillu suleqateqartariaqaratik. IA tallimanik inissarsivoq, inissarlu kingulleq Atassutip pissarsiaraa.