IA Kimimut: Inatsisartut sulinerannut akulerunnak
Mittarfiit pillugit sukkasuumik aalajangiisoqarnissaanut Naalakkersuisut kimigiiserpallaarnerat pillugu Hans Enoksenip uparuassagaa Múte Bourup Egede piumasaqarpoq
Inatsisartut qanoq sukkatigisumik sulinissaannut Naalakkersuisut akuliutissanngilluinnarput. IA-p gruppiata siulittaasua Múte Bourup Egede isumaqarpoq.
Kingullermik Kim Kielsenip (S) aasaanerani ataatsimiittoqarsinnaaneranik Sermitsiami juunip 22-anni oqariartuuteqarnera, Múte Bourup Egedep eqqarsarnartoqartippaa.
- Mittarfiliornissat pillugit Inatsisartut qulaatiinnarlugit qanoq suleriuseqartariqarnermik Naalakkersuisut arlaleriarlutik tusagassiorfitsigut oqaaseqaqattaarnerat pissusissamisuunngilluinnarpoq. Nalakkersuisut ataqqisariaqarpaat inatsisissatut siunnersuutertik maanna Inatsisartunit suliarineqarmat Inatsisartunilu ilaasortat amerlanerussuteqartut suliap nukingerfiunngitsumik sukumiisumillu suliarineqarnissaa kissaatigimmassuk, taanna oqarpoq.
Maajip naaneranili IA-p attaveqaqatigiinnermut naalakkersuisoq, Simon Simonsen (S) isornartorsioreerpaat, taassuma Kalaallit Airportsip mittarfinnik suliarinnittussarniornini ingerlatiinnassagaa kaammattuutigimmagu.
Mittarfinnut pilersaarutit 2015-imili ilisimaneqareernerat, Kim Kielsen Sermitsiami unnersuussivoq.
- Taamaammat neriuutigaara Inatsisartut aammalu minnerunngitsumik Inatsisartut Aningaasaqarnermut Akineraartarnermullu Ataatsimiititaliaata suliamut tunngatillugu sulinertik nangittumik pimoorullugu ingerlatissagaat inatsisissarlu isiginiarneqartariaqartut taakku aallaavigalugit suliarissagaat. Partiimmi taakkuupput, taamani 2015-mi suliamik aallartitsinikuusut. Taamatuttaaq partiit taakkuupput, aningaasaqarnermut inatsit aqqutigalugu Naalakkersuisunut suliamik ingerlatsinissamut pisinnaatitsissutinik pisariaqartunik tunniussinikuusut, neriuppungalu partiit tamanna eqqaamassagaat. Tamakkiisumik Aningaasaqarnermut Ataatsimiititaliap sulineranik ataqqinnillunga aammalu piffisamik pisariaqartitsinerannik ataqqinnillunga, isertuutissanngilara kissaatigigakku suliap sapinngisamik piaartumik naammassineqarnissaa, tamanna aamma isumaqassappat Inatsisartut aasaanerani immikkut ittumik aggersarneqarnissaannik tamanna kinguneqassappat, Sermitsiamut taama oqarpoq.
Enoksen uparuaasariaqarpoq
Taamatut oqariartuuteqarneq Inatsisartut siulittaasuannit uparuarneqartariaqarpoq, Múte Bourup Egede (IA) isumaqarpoq.
- Manna aqqutigalugu aammaarluta Inatsisartut siulittaasuat kaammattorumavarput Naalakkersuisunut ersarissaaqqullugu suliariaatsip ataqqineqarnissaanik aammalu qulangiisutullusooq Inatsisartut sulinissaanut sunniiniarneq akuerineqarsinnaanngitsoq unitsinneqarluinnartariaqartorlu. Pissaanerummi qanoq agguarneqarsimaneranut ataqqinnippalaanngitsumik oqariartoqattaarnerit ataqqeqatigiilluni suleqatigiinnissamut iluaqutaanngimmata, taanna oqarpoq.
Inuit Ataqatigiit mittarfiliortiternissamut suliniut kinguarsarniarsarinianngikkaat, taassuma naqissuserpaa.
- Kisianni inuiaqatigiit aningaasaataannit milliardit koruunit arlaqartut atorniarutsigit, taava suliaq peqqissaarullugu suliarisariaqarparput, taanna Sermitsiaq.AG-mut oqarpoq.
Kim Kielsen pillugu allaaserisaq tamaat Sermitsiaq normu 25-mi atuarsinnaavat: