Angallanneq

IA: Kiffartuussinissamut isumaqatigiissutini innuttaasut ilanngunneqarlik

Sullissinissamik isumaqatigiissutit inuiaqatigiit akilertarmatigit angallassinerit qanoq ittuunissaat aamma inuiaqatigiit peqataatillugit aalajangerneqartariaqarpoq, partii illuatungiliuttoq isumaqarpoq

- Qinikkat atorfilittallu kisimik pinnatik aammali innuttaasut sinniisaat, inuussutissarsiortut, allallu peqataatillugit angallannerit qanoq ittuunissaat piaartumik aalajangersareerneqartassasoq piumasaraarput.

Aqqaluaq B. Egede (IA) partii sinnerlugu tusagassiuutinut nalunaarummi allappoq. Taassuma erseqqissarpaa, aamma taakku isumaqatigiissutissatut siunnersuutinik akuersereeraangata isumaqatigiissutit atsiorneqartassasut piumasaraat.

Atuaruk: Kiffartuussinissamut isumaqatigiissutit nutaat pillugit akerliussutsimik takutitsineq

Kina eqqortumik oqaluppa?
Tassunga tunngatillugu partiip illuatungiliuttup suna eqqortuunersoq ilisimatitsissutigeqquaa, tassami Kommune Kujallermi borgmesteri oqarpoq isumaqatigiissutit pillugit isumasiorneqarsimanatik, illuatungaanilli angallannermut naalakkersuisoq Knud Kristiansen oqarpoq, Kommune Kujalleq aammalu Kanukoka peqataatinneqarsimasut.

- Ataqatigiiissumik sullissineq anguniarlugu misilittakkat pitsaasut pitsaanngitsullu ilinniarfigisariaqarpavut. Assersuutigalugu Qeqertarsuup Tunuani imaatigut silaannakkullu angallanneq ataqatigiinngitsoq pitsaanngitsunillu misilittagaqarfigineqartoq assiliinavillugu Kujataanut nuunneqarsinnaanngilaq ajornartorsiutaareersut aaqqinneqarsimatinnagit, Aqqaluaq B. Egede oqarpoq.

- Taamaammat aningaasaliissutit amerlineqarpata sullissinerit aaqqissuuteqqinneqarnissaannut piffissaq tulliuttoq atorneqartariaqarpoq.

Angallannikkut sullissinermut isumaqatigiissutit 2015-imi katillugit 151,2 millionit koruuninik aningaasartaqarsimagaluariarlutik 2020-imi 122,9 millionit koruuninut ikilisinneqarniarput.

Atuaruk: Kommune Kujalliup kiffartuussinissamut isumaqatigiissut dumpertippaa

Powered by Labrador CMS