Skip to main content

IA: Kalaallit Nunaat peqataava avataaniippaluunniit?

Naalakkersuisut siulittaasuata Aleqa Hammondip Issittumi Siunnersuisoqatigiit ataatsimiinnerannik mattussinerata kingorna IA-meersup Sara Olsvigip paaserusuppaa ullumikkut qanoq inissisimasoqarnersoq

Naalakkersuisut siulittaasuat Aleqa Hammond aalajangersimavoq Nunatta Issittumi Siunnersuisoqatigiinni peqataanera uninngatinneqaannarallassasoq. Tamanna Aleqa Hammondip paragraf 37 naapertorlugu Sara Olsvigip, Inuit Ataqatigiit, apeqqutaanut akissummini uppernarsarpaa.
– Tassa imaappoq, mattussinermi ilaapput Issittumi Siunnersuisoqatigiinni suleqatigiissitaliat tamarmik, task forces-it, suut tamaasa akimorlugit suliniutit immikkullu ilisimasallit kiisalu politikkikkut ataatsimiinnerit tamarmik. Soorunami tamatuma kinguneraa Kalaallit Nunaata nammineq piumassutsiminik ataatsimiinnerni tamakkunani toqqaannartumik sunniuteqarnissaminut imminut mattuttoq. Taamaattumik Inatsisartunut pingaaruteqartorujussuuvoq arajutsisaassallugu ataatsimiinnerit qanoq amerlatigisut pineqarnersut, aammalu ataatsimiinnerni, Kalaallit Nunaata arlaatigut peqataaffigisassaraluini, suut oqaluuserineqarnersut.
Taamatut Sara Olsvig allappoq, apeqqutigeqqippaalu ataatsimiinnerni peqataasannginneq Kalaallit Nunaannut qanoq kinguneqassanersoq.
Inatsisartut sinnerlugit Naalakkersuisunut sisamanik apeqquteqarpoq, nassuiaatigeqqullugu ullumikkut qanoq inissisimasoqarnersoq.
– Naalakkersuisut uppernarsarsinnaavaat Issittumi Siunnersuisoqatigiinni suleqatigiissitaliaq Arctic Monitoring and Assessment Programme (AMAP) ukioq manna Nuummi ataatsimiittussaagaluartoq, Kalaallilli Nunaata Issittumi Siunnersuisoqatigiinnik mattussinera pissutigalugu ataatsimiinnissaq maanna Savalimmiuni ingerlanneqassasoq?
– Ukiup aggersup ingerlanerani Issittumi Siunnersuisoqatigiinni ataatsimiinnerit suut ingerlanneqartassappat, tassa politikkikkut ataatsimiinnerit, suleqatigiissitaliani ataatsimiinnerit, suut tamaasa akimorlugit suliniutit pilugit ataatsimiinnerit, immikkut ilisimasallit ataatsimiinnerat aamma task forces?
– Ataatsimiinnerni tamakkunani Kalaallit Nunaata sunniuteqarnissaa qulakkeerniarlugu Naalakkersuisut qanoq iliuuseqarniarpat, Kalaallit Nunaat ataatsimiinnerni toqqaannartumik peqataaneq ajorpat?
– Ataatsimiinnernut Issittumi Siunnersuisoqatigiinnut attuumassutilinnut naalagaaffeqatigiit iluanni piareersarnernut Kalaallit Nunaat suli peqataasassava, imaluunniit naalagaaffeqatigiinni ataatsimut suliniutissat ataqatigiissarneqarneranni mattussineq aamma atuuppa?

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER