IA-mit kaammattuutigineqarpoq tamat peqataatillugit ilaasunik angallassisarneq isumaqatigiissutigineqassasoq

IA-p siulittaasuata Múte B. Egedep Naalakkersuisut kaammattorpai, innuttaasut toqqissisimateqqilerniarlugit, kiffartuussinissamut isumaqatigiissutit isumaqatiginninniutigineqarnissaanut partiit piaartumik peqataatinneqassasut

Disko Line, Najaaraq Ittuk

- Kiffartuussinissamut isumaqatigiissutissat piaartumik sinaakkuserneqartariaqarput, Múte B. Egede, Naalakkersuisut malinnaasimannginnerannik isumaqartoq erseqqissaavoq.

- Innuttaasut ullumikkut toqqissisimanngillat. Sumiiffinni arlalinni atortut katersugaasivinni takusassiassatut isikkoqarput, Kalaallillu Nunaanni silap pissusaanut naleqquttuunatik, partiimi siulittaasoq, kiffartuussisut atortuinut tunngatillugu peqqissaartumik periarfissinneqartariaqartut isumaqartoq, oqarpoq.

Isumaqatigiissutit piffissami sivisunerusumi atuutinneqassasut

Kim Kielsenip sapaatip akunnerani kingullermi Sermitsiakkut ilisimatitsissutigaa, kiffartuussinissamik isumaqatigiissutit sivitsorneqarnissaat sulissutigineqartoq, tassa maanna isumaqatigiissutit ukiuni sisamani atuuttarfiannit sivisunerumik atuuttussanngorlugit. Taamaalilluni kiffartuussisut periarfissinniarlugit atortunut nutaanik pitsaanerusunullu aningaasaliissuteqarnissaannut.

- Isumaqatigiissutit atuuffiisa sivitsorneqarnissaannik isumassarsiaq isumaqatigisinnaavara. Kim Kielsenilli kiffartuussinissamut isumaqatigiissutissat nutaat pillugit nalunaarutai allat allanngortoqannginnissaanik nipeqarnerupput, tamannalu anguniagaqanngitsutut isikkoqarpallaaqaaq, illuatungiliuttutut politikkeri oqarpoq.

- Innuttaasut toqqissisimatinniarlugit pitsaasunillu atugassaqartinnissaat qulakkeerniarlugu, tamat peqataatillugit ilaasunik angallassisarneq isumaqatigiissuteqartariaqarpugut, IA-mi siulittaasoq oqarpoq.

Powered by Labrador CMS