IA inatsiseqarnermi iliuusissanik arlalinnik amigaateqarpoq

- Inuit ataqatigiinniit isumaqarpugut pinerluttunik isumaginnittoqarfik pillugu isumaqatigiissuteqarneq angusaqarfiugaluarluni, taammaattoq annertunerusumik pinerlutaaliuineq pillugu suliniutinik annertunerusumik imaqannginnera pakatsinartutut isumaqarfigaarput.

Nunatsinni pinerluuteqarsimasut pillugit isumaqatigiissut pillugu Debora Kleist (IA) tusagassiuutinut nalunaarummi taama allappoq. isumalluarnartuinnaanngilaq

- Soorunami oqarsinnaavugut pissutsit pitsanngoriartortut,taammaatorli politikkikkut suli annertuumik unammilligassaqarpoq. Politiit, kommunefogedillu atugarisaasa ilinniaqqisinnaaneranullu periarfissaasut suli pitsaanerusinnaanerat isumaqarfigaarput, taanna erseqqissaavoq.

Ukiut arlerlugit Inuit Ataqatigiit pinerluttulerinermi inatsit aammalu nunatsinni eqqartuussisarneq pillugu inatsisip allanngortinneqarnissaa, atugarisaasullu pitsanngorsartuarnissaat suleqataaffigiuarsimallugillu ilungersuutigiuarsimavarput.

Inatsisartunilu amerlanerussutillit isumaqataaffigisaannik iliuusissatut pilersaarusiornissamik suliaqartoqarnissaa isumaqatigiissutigineqarpoq, Debora Kleist oqarpoq.

- Eqqartuusiveqarneq eqqarsaatigigaani illersuisunik, domsmand suli ilinniartitsinissaq aallunneqarnerusariaqarpoq, tamannalu aamma aningaasanik naleqarpoq, taanna oqarpoq.

Inatsisartuni ukiakkut ataatsimiinnerni naammassineqaqqammersumi pinerluttulerinermut inatsisisip kiisalu kommunefogeditut atorfiit inuttalersorneqarnissaat allannguutissatut siunnersuummi oqallisigineqarput.

- Inuit Ataqatigiit pingaaruteqarluinnartutut isigaarput pinerluuteqarsimasup kissaatigippagut Danmarkimiiginnarnissani taava tamanna pisinnaatitaaffiussasoq kiisalu atugassarititaasut ullumikkumut ajornerulissanngitsut. Kiisalu pinerluuteqarsimasup nunatsinnut utereernerup kingorna ugguarsinnaanermut periarfissaqartitaanissaa inissamisoorsoraarput, Debora Kleist oqarpoq.