isornartorsiuineq
IA: Ilaqutariinnut Naalakkersuisup nammineq kukkunini atornerlukkaa
Ilaqutariinnut Naalakkersuisup Kommuneqarfik Sermersooq ataatsimiinnermut agginngitsoortutut pisuutippaa, nassuerutigaluguli ataatsimiisitamut siulittaasoq Malene Lynge qaaqquneqarsimanngitsoq
- Oqartoqartarpoq qaaqquneqarani agginngitsuuginnaraanni ugguaatissaqanngitsoq. Taamaattorli Ilaqutariinnut Naalakkersuisoq Martha Lund Olsen Siumumeersoq soorlu isumaqataanngitsoq.
Kommuneqarfik Sermersuumi Isumaginninnermut, Suliffeqarnermut Inuussutissarsiornermullu Ataatsimiititami siulittaasoq Malene Lynge Inuit Ataqatigiit oqarpoq.
Tusagassiuutitigut nalunaarusiami maajip 27-ani saqqummiunneqartumi meeqqanut inuusuttunullu sullissineq, piffissarlu sivisooq suliffissaqanngitsut, siusinaartumillu pensionisiallit pillugit ataatsimiinnissami paasilersimavaa Kommuneqarfik Sermersooq aallartitaanik ilaasoqanngitsoq.
- Ingerlaannaq takugakku naalakkersuisoqarfik attavigaara, naalakkersuisullu allatsiata oqaluttuuppaanga qaaqquneqarnissara puigorneqarsimasoq, Malene Lynge oqaluttuarpoq.
- Naak puiguinnarneqarsimagaluartoq Martha Lund Olsen allatsini aqqutigalugu kukkunini nassuerutigerusunngilaa, naqqillugu.
Tusagassiuutinut qulequtarineqartoq imaappoq ”Partiit akimorlugit suleqatigiit tamat suleqatigiinnissaanik pisariaqartitsineq”, tamannalu Malene Lyngep quiagalugu oqaatigaa.
- Tassa tamakkuupput amigartumik partiitut politikkerniaalunnermut assersuutissapalaaq. Naalakkersuisoqarfiup qaaqqusinissani puigoriarlugu peqannginnera patsisiliuppaa Kommuneqarfik Sermersooq suleqataajumanngitsutut, Malene Lynge oqarpoq.