IA-gruppia: Kvik-test akeqanngittariaqarpoq
Nuummi tuniluuttoqangaatsiarmat kviktestit akeqanngitsumik agguaanneqartariaqaraluarput, Kommuneqarfik Sermersuumi IA-p gruppia taamatut isumaqarpoq.
Nunami sumiiffinni assigiinngitsuni tuniluuttoqangaatsiarnera pissutigalugu coronamut misissuisarfiit tamaviaartinneqarput. Annertuumik tuniluuttoqarnerata malitsigisaanik misissortikkiartorlutik tulleriaattorpassuaqartarnera isornartorsiorneqartarpoq. Pingaartumik illoqarfiit pingaarnersaanni innuttaasut coronamut misissortikkiartorlutik nalunaaquttap-akunneri pingasut angullugit utaqqisoqartarluni.
Taamatut inissisimasoqarnerani pisortat misissuisarfinnik annertusaasariaqarput imaluunniit Nuummi innuttaasunut kviktestinik akeqanngitsunik agguaassisariaqarput. Taamatut isumaqarput Kommuneqarfik Sermersuup kommunalbestyrelsiani IA-p gruppia aamma Nuummi IA-p immikkoortortaqarfia - Nuummi IA:
- Nuummi pisiniarfinni marlunni kviktestit ullualuit ingerlanerinnaanni nungunneqarsimapput. Innuttaasullu misissortinniarunik misissuisarfik kisiat periarfissarileqqippaat, politikkerit marluk tusagassiorfinnut nalunaaruteqarnermi Juaaka Lyberthip Ove Karl Berthelsenillu atsiorsimasaanni allapput.
Toqqissisimanaranilu naammaginanngitsoq
Sapaatip-akunnerata naanerani coronamik tunillatsissimasut aatsaat taamak amerlatigalutik 504-simapput, IA-milu politikkerit taakku marluullutik erseqqissaassutigaat, pissutsit maannakkutut itsillugit naammagineqanngilluinnartut:
- Tuniluunnerup siaruaatipiloornera, misissueriaaseq akissutisisarnerlu aamma oqartussat taamatut inissisimasoqarneranik iliuuserisaat Nuummi innuttaasorpassuarnit toqqissisimatitsinatillu naammagineqanngillat, taakku allapput.
Gruppit taakku marluk kviktestit akeqanngitsumik agguanneqartarnissaannik kissaateqarnermik saniatigut oqartussanut piumasaraat, misissuisarfiit amerlineqassasut. Politikkerit ilaatigut siunnersuutigaat, peqqinnissaqarfiup artukkeqqinneqarnissaa pinaveersaartinniarlugu, Issittumi Sakkutooqarfiup Nuummi immikkut coronamut misissuisarfimmik pilersitsilluni ikiuunnissaanik Naalakkersuisut qinnuiginnissasut. Naalakkersuisut aamma kommunit misissuisarfinnik ingerlatsinissaannik ammaassinnaagaat, siunnersuutigineqarpoq.
Najukkami IA-p gruppii marluk taakku kisimik naammaginninngillat. Inatsisartuni illuatungiliuttut aamma isornartorsiuisimapput.
Wangenheim: Peqqinnissaqarfimmut saaffiginnittartut immikkoortinneqalissapput
Inatsisartut Ilaqutariinnermut Peqqissutsimullu Ataatsimiititaliaanni siulittaasup tullia Anna Wangenheim (D) isumaqarpoq, kviktestit innuttaasut peqqinnissaqarfimmut saaffiginnittartut naligiinngitsumik pitittalissagaat:
- Kissaatigaara kikkut kvik test atorlugu misissorneqarsinnaanerat Naalakkersuisut isummerfigissagaat, kviktestimmi pisiaripallanneqarsinnaapput kingusinnerusukkullu PCR atorlugu sukkanerusumik misissortinnissamut aqqutigineqarsinnaallutik – tassa allanik siulliullutik misissortinnissamut akuerineqarsinnaallutik.
- Kviktestit ataatsit pisiniarfimmi minnerpaamik 40 koruuneqarput. Inuit tamarmik kviktestimik pisiaqarnissamut akissaqanngillat, taamalu oqartussat inassuteqaataannik malinnikkuminaatsitsisarlutik. Misissuisarfiit amigaateqarnerisa malitsigisaannik nalunaaquttap-akunnerpassuini tulleriaattut akornanniinnissaq kajungerineqarneq ajorpoq, tunillatsissimasimasumut qanillisimagaluaraanniluunniit, Anna Wangenheim oqarpoq.
Naalakkersuisut Siulittaasuat Múte B. Egede (IA), sapaatip-akunnerani kingullermi pingasunngornermi tusagassiortunik katersortitsinermi oqarpoq, misissuisarfinni maannakkorpiaq artukkerneqarsimasuni tulleriiaattoqartarnera pinngitsoortinniarlugu angerlarsimaffimmi imminut misissuutaasinnaasut amerlanerit pissarsiarineqarsinnaanerat sulissutigineqartoq. Naalakkersuisut ataasinngornermi tusagassiortunik katersortitseqqissapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...