Nødhjælp

IA: Filippinerne-mi eqqugaasut sooq ikiunngilagut

Nunarsuarmiut tamarmik ajunaarnersuarmi ikiorsiissutinik Filippinerne-mut nassiussuipput nunarsuarmiooqataasutut akisussaassuseqarnertik takutinniarlugu. Manna tikillugu Kalaallit Nunaat ikinngutinnersumik allagaqaannarpoq

Naaja Nathanielsenip paasisinnaanngilaa Nunatsinnit Filippinerne-mut ikinngutinnersunik misiginneqataasunillu allagaqaannaratta.

– Sooq Naalakkersuisut Filippinerne ajunaarnersuarmi ikiorsiissutinik ikiunngilaat?
Taamatut Naalakkersuisunut apeqquteqarpoq Inatsisartunut ilaasortaq Naaja Nathanielsen, IA.
– Filippinerne-mi kiattup anorersua inuit 4.500-t inuunerannik akeqarsimavoq, anorersuullu asorortigai suli amerlanerusut inuunerannik akeqarsinnaavoq ajornartorsiortut ikiorneqanngippata. Nunarsuarmiut tamarmik ulluni makkunani ikiorsiissutinik Filippinerne-mut nassiussuipput nunarsuarmiooqataasutut akisussaassuseqarnertik takutinniarlugu. Manna tikillugu Kalaallit Nunaat Fillipinerne Danmarkimi aallartitaqarfianut ikinngutinnersumik misiginneqataanermillu allagaqaannarsimavoq, Naaja Nathanielsen oqarpoq isumaqarluni Kalaallit Nunaat annertunerulaartumik iliuuseqarsinnaalluartoq.
– Allakkat soorunami ajungisaarnerupput pitsaasut, piviusumilli ikiuineq pitsaanerussaaq. Landskarsimi konto 20.11.50 atorlugu Naalakkersuisut periarfissaqarput ajunaarnersuarmi ikiorsiissuteqarnissaannut ukiumut katillugit 500.000 koruuninik, Naaja Nathanielsen oqarpoq.
Tamatuma saniatigut paaserusuppaa ukioq manna ajunaarnersuarmi ikiorsiissutitut aningaasat qanoq amerlatigisut Naalakkersuisut kontu 20.11.50-imit tunniussimaneraat, aamma nunanut allanut ikiorsiissuteqarnissamut Naalakkersuisut tunngavissaasunik peqarnersut naammassineqartariaqartunik, Filippinerne-milu ajunaarnersuaq tunngavissanut tamakkununnga atuunnersoq.

Powered by Labrador CMS