IA-mit borgmesterissatut piukkunneqartoq
Kommuneqarfik Sermersuumi suliat ajornartorsiutitaqartut arlallit sammineqareersut borgmesteri Charlotte Ludvigsen borgmesteritut tallimanngormat tunuarniarluni aalajangersimavoq. IA-p borgmesterissatut piukkutaa marlunngornermi tamanut saqqummiunneqassaaq.
Illoqarfiit pingaarnersaata kommuniani kina borgmesterinngussanersoq marlunngornermi saqqummiunneqassaaq. Sermitsiaq.AG-p paasissutissaatai malillugit, Avaaraq S. Olsenip Charlotte Ludvigsen taarsissavaa.
Borgmesterissatut ullumi akuersissutigineqassappat, kujataarmiup Kommuneqarfik Sermersuumi kanngunartuliatut suliarineqarsimasorpassuit torersartariaqassavai, kanngunartuliarpassuit Nakkutilliisut kommunip 2019-imili inissianik attartoriarluni attartortitseqqiisarsimaneranik apeqqusiisimapput.
Suliaq borgmesteriusimasup Asii Chemnitz Narupip naalakkersuisuujunnaarneranik kinguneqartut, taannami inissaqartitsiniarluni suliaqarsimanini pissutigalugu naalakkersuisutut tunuarpoq.
Suliami saqqummerartut amerlasimaqaat, kommunillu ingerlatsisimanera, NCD taarsigassarsisitsisimanerillu kommunalbestyrelsimut akueritinneqaqqaarsimanngitsut arlallit saqqummiunneqarsimallutik, tamakkulu malitsigisaannik Charlotte Ludvigsen borgmesteritut tunuarsimalluni.
Kujataarmiu
Avaaraq S. Olsen Facebooki malillugu 1984-imi inunngorsimavoq, Narsameersuullunilu. Ilimmarfimmi 2018-imi Institut for Læringimi ilinniakkaminik naammassinnissimavoq.
Kingullermik kommunimut qinersisoqarmat 241-nik taaguunneqarsimavoq, tassa IA sinnerlugu kommunalbestyrelsimi ilaasortanit taaguunneqarnerpaasimasunit Juaaka Lybertsimit, Uju Petersenimit borgmesteriujunnaartumillu Charlotte Ludvigsenimit normu firetut taaguneqarsimalluni.
Meeqqanut Ilaqutariinnullu Ataatsimiititami siulittaasuuvoq, aamma Autgarissaarnermut Suliffeqarnermullu Ataatsimiititami ilaasortaalluni.
Kommuni Kujallermi kommunalbestyrelsimi 2013-imiit ilaasortaasimavoq, taamanikkut IA sinnerlugu qinigassanngortissimasunit taaguunneqarnerpaat tullerisimallugu.
Avaaraq Olsen aamma IA-p inuusuttortaanni ilaasortaallunilu siulittaasuusimavoq kiisalu IA-p siulersuisuunerinut ilaasortaasimalluni.