IA Avannaata: Inuit innarluutillit atugarissaarnerulernissaannut aningaasaliisoqarneruli

Inuit Ataqatigiit Avannaata Kommuniani kommunalbestyrelsemi ilaasortaatitaat, Bendt B. Kristiansen kommunip inuit innarluutillit pillugit pingaarnersiuineranut toqqortunngivilluni oqaaseqarpoq.

- Ukiuni kingullerni kommunip aningaasanik missingersuusiortarnermini ikorfartortariaqarnerusunut aningaasaliissutinik naammattunik illikartitsisarsimannginnera nalunaarusiami takuneqarsinnaavoq, Bendt B. Kristiansen, Inuit Ataqatigiit sinnerlugit kommunalbestyrelsemi ilaasortaq oqarpoq.

Aningaasanut missingersuut IA ukiuni kingullerni isumaqatiginninniutigisarpaat.

IA-lli ikinnerussuteqarnini malugisarpaa. Pingaartumik kommunip illoqarfiini aqquserngit asfaltilersorneqarnerinut immikkut aningaasaliisoqartillugu.

Asfalti peerallarli

Avannaata Kommuniata aningaasanut missingersuutai naapertorlugit, kommuni inuit innarluutillit pillugit 2020-mi 93,7 millionit koruuninik aningaasaliisimavoq. 2018-mut sanilliullugu aningaasaliissutit 4 millionit koruuninik amerlanerupput.

Aningaasat inuit innarluutillit inuunermi atugaannut pitsaanerulersitsinissamullu immikkoortinneqarsimapput.

Aningaasaliissutilli amerlanerusariaqarput, Tiliummi nalunaarusiaata takutippaa, suli aqqutissaq takisoq, politikeri isumaqarpoq.

Inuit Ataqatigiit isumaqarput kommunip aqqusinernik asfalterinini, aamma aqquserngit asfaltilersornissaannut immikkut aningaasaliissuteqartarnini unitsikkallartariaqaraa, aningaasallu inuit innarluutilinnut pitsanngorsaanissamut atorlugit.

Soorlu teknikimut avatangiisimullu ingerlatsivik missingersuutinit annertunerusumik atuisimavoq. Aningaasat ilaatigut asfaltilerinermut atorsimapput, asfaltilerinermilu sulinermi qaangiuttoorutinut atorsimallutik.

- Aningaasartuutit taama ittut kingulliunneqartariaqarput, taavalu isumaginninnikkut aammalu inuit innarluutillit atugarisaannut pitsanngorsaanissamut aningaasat atorlugit. Soorlu aamma meeqqanut inuusuttunullu immikkut pisariaqartitsisunut atorsinnaasut. Inuit Ataqatigiit tamakku ukkatarerusuppaat, amerlanerussuteqarnissarlu ujartorparput, Bendt B. Kristiansen Sermitsiaq.AG-mut oqarpoq.

Taanna isumaqarpoq asfaltilerinermi aningaasartuutinit minnerpaamik 10 milliuunit koruunit aaneqarsinnaasut. Isumaginninneq aamma inuit innarluutillit aningaasanut missingersuusiornermi pingaarnersiorneqarpata, IA taaseqataasinnaalissasoq, oqariartuutigineqarpoq.

Pitsanngorsangassat allat

Tiliup angalaneranit nalunaarusiami tikikkuminassuseq pillugu immikkoortortaqarpoq. Qaanaami asfaltilersukkanik aqqusineqanngilaq. Aqquserngit ujaraaqqanik sanaat assersuutigalugu pisuut issiavilluunniit assakaasulik motoreqanngitsoq atorlugu ingerlanissaq ajornakusoortippaat. Issiaviit assakaasullit inunnit marlunnit ilaanni ajattarneqartariaqarput, qummukajaakkoorutissagaanni.

Bendt B. Kristiansenili isumaqarpoq illuutit, soorlu pisiniarfik aamma kommunip allaffii, pitsanngorsaavigissallugit siulliunneqartariaqartut.

- Illuutinut tikikkuminassuseq siulliunneqartariaqarpoq. Matut ammaruminartut isaariallu majorallaffilersorneri, piffissaq sivikitsuinnaq atorlugu suliarineqarsinnaapput. Asfaltilersuinermit taakku aaqqilertorneqarnerusinnaapput, Bendt B. Kristiansen oqarpoq.