IA Avannaa: Partii avissaartuuteqqasoq isumaqatiginninniarfigineqarsinnaanngilaq

Avannaata Kommuniani partiit sisamat Siumut kaffisoqatigalugu ataatsimeeqatigisimavaat, partiimili aaqqiagiinngissutaasut iluarsineqartinnagit kommunalbestyrelsimi atuuffiusussat pillugit partiit Siumumut isumaqatiginninniarusunngillat.

IA' Bendt B. Kristiansen

Marlunngormat kommuninut qinersisoqarmalli Avannaata Kommuniani Siumut tigussaasumik suli isumaqatiginninniarfigineqanngilaq.

Bendt B. Kristiansen Inuit Ataqatigiinneersoq Sermitsiaq.AG-mut oqarpoq, partiit Siumumut isumaqatiginninniarnissaat suli allartinneqarsimanngitsoq.

- Siumormiut iluminni ajornartorsiuteqarnertik pissutigalugu partiiminniluunniit amerlanerussuteqartussanik katersisinnaanngillat. Partii qanoq inissisimanersoq nalungatsigu isumaqatiginninniarluni aallartinnissamut tunngavissaqanngilaq. Siumut qanoq inissisimanersoq siumoortumik ilisimareertussaavarput, maannakkorpiarlu tamanna paasisaqarfigisinnaanngilarput, Bendt B. Kristiansen oqarpoq.

Siumup iluani ajornartorsiutigineqartut suunersut ilisimasaqarfiginngilluinnarpai.

- Taamaammanuna aaqqiagiinngissutaasut sumut tunngassuteqarnersut partiimit erseqqissumik oqaatigeqqungaluarivut. Borgmesteri Palle Jerimiasseni Minik Høegh-Dam pillugu misissuisitsilersimavoq, tamanna tunngavigalugu misissuinerit sumut tunngassuteqarnersut paasisaqarfigerusuppavut. Isumaqarpugut paasissutissat pissarsiarineqartut isumaqagtiginninniarnernut aporfiussanngitsut, IA-meersoq Bendt B. Kristiansen oqarpoq.

Powered by Labrador CMS