Ini pillugu oqallinneq
IA Avannaani: Inip sumi inissisimanera ajornartorsiutaanngilaq
Siumut tunuliaqutaralugu Inatsisartuni ilaasortaasut Naalakkersuisunut piumasaqarput Ini sumi inissisimanissaa aalajangiiffigeqqullugu. Tamannali politikkerit aalajangiiffigisinnaanngikkaat IA sinnerlugu Qaasuitsup Kommuniani kommunalbestyrelsimi ilaasortaq oqarpoq
Inissiaatileqatigiiffik Ini Nunatsinni sumi inissinneqassanersoq pillugu Siumumi Inatsisartunut ilaasortaasut Anders Olsenip aamma Jess Svanep Naalakkersuisut qisuariaateqarnissaat piumasaraat, tamanna Sermitsiaq.AG-mi sapaatip akunnerani matumani allaaserineqarpoq.
Inissiaatileqatigiiffimmi pisortanngorlaap Henrik Rafnip qullersaqarfimmilu sulisup nuna tamakkerlugu immikkoortortaqarfimmik suleqateqarnissaq anguniarpaat, taamaammallu Nuummiikkuusullutik.
- A/S Ini-p Sisimiuni qullersaqarfia Nuummut Nuunniarsarineqarpa? Imaluunniit qanoq paasisisariaqarpa, Siumumi politikkerit apeqquteqarput.
Politikkerit aalajangigassarinngilaat
Qaasuitsup Kommuniata kommunalbestyrelsiani ilaasortaasup Bendt B. Kristiansenip Inuit Ataqatigiinneersup taamatut apeqquteqartoqarnera isornartorsiorpaat. Inissiaatileqatigiiffik sumi inissisimassanersoq politikkerinit aalajangerneqartussaanngitsoq oqarpoq.
Ineqartut ullormit ullormut ilungersorlunik atungaqarnerat Naalakkersuinikkut iliuuseqarfiginiarneqanngippallaartoq IA tunuliaqutaralugu politikkeri oqariartuuteqarpoq.
- Ineqartut inissiat aserfallassimasuni qaammammullu akiliutit qaffasissuni atugaqarnerini A/S INI-p pisortaata sumi issianera apeqqutaanngilaq. Siumut uparuaavoq A/S INI-p pisortaata Sisimiuni allaffeqarfeqartariaqarneranik Naalakkersuisut A/S INI-mut qisuariaateqassasut. A/S INI-p pisortaa Sisimiuni issiaveqarpat ineqartut atungaat pittaanerulissappat?, Bendt B. Kristiansen tusagassiutinut nalunaarummi taama aperaaq.
Inissiaatileqatigiiffimmit ajornartorsiutigineqartut iliuuseqarfigineqarnerusariaqartut isumaqarpoq.
- Inatsisartut inatsisaat peqqussutaallu naapertorlugit ineqartut ulluinnarni atugaat ilungersunartumi inissisimapput, taamaattumik inatsisiliortut suliassartik pimoorunnerusariaqarpaat mikisualulerinermut piffissaq atornangu. Aallunneqarneruniarli qanoq iliornikkut inissiat aserfallassimassusaasa ineqartunut akilingassiissutigineqartarunnaarnissaata inatsisiliornikkut aaqqiivigineqarnissaa.
- Qanittumi Nuummi ineqarneq pillugu isumasioqatigiinnermi ineqartup ullumikkut ajornartorsiutaa qanoq iliornikkut aaqqiiviginiarneqarsinnaanersoq pisortaqarfimmit Naalakkersuisunilluunniit sammineqanngilaq, tamannalu assut pakatsinarpoq. Ineqartut atugaat annerusumik allannguiffigineqarsinnaanngillat inatsisiliornikkut tulluussaasoqanngippat, Bendt B. Kristiansen oqarpoq.