isumannik paasiniaaneq

IA annerpaanngorsinnaasut

Inatsisartunut ullumi qinersisoqaraluarpat IA aamma Partii Naleraq siuariassagaluarput. Atassut kinguariassagaluarput

HS Analysemit Sermitsiaq suleqatigalugu Kalaallit Nunaanni innuttaasut katitigaanerannut naapertuuttumik sinniisut aperineqarput Inatsisartunut ullumikkut qinersisoqartuugaluarpat kikkunnik taaserusunnerannik.

Inuit Ataqatigiit 33,5 procentiniit 36,2 procentinut, 2,7 procentpointinik, siuariangaatsiassagaluarput. Siuariarnerup nassataanik partii Inatsisartuni suli allamik ilaasortaatitaqalissagaluarpoq taamaalillunilu partiini annerpaanngussagaluarluni.

Partii Naleraq inuit isumaanik paasiniarnermi ajugaasut aapparaat. Hans Enoksenip partiia taasinerit 11,7 procentiiniit 13,6 procentiinut siuariassagaluarpoq. Partii Inatsisartunut ullumikkut qinersisoqartuugaluarpat ilaasortaatitami sisamassaannik pissarsissagaluarpoq.

Atassut kinguariaqqippoq Inatsisartunut ullumikkut qinersisoqartuugaluarpat taasinerit 4,5 procentiinik pissarsissagaluarpoq. Kinguariarnerup nassataanik partiip Inatsisartunut ilaasortaatitami marluusut aappaat annaassagaluarpaa.

Isumasiuineq tatiginassutsimik 2,7 procentimik nalorninaateqartutut naatsorsorneqarpoq.

Isumasiuineq pillugu Sermitsiami paasisaqarnerugit:

Powered by Labrador CMS