IA aamma Uraani Naamik: Siorasaarinerit akuerineqarsinnaanngillat

Inuit Ataqatigiit, Kuannersuarni suliap annertuup ingerlanneqarneranut tunngatillugu isornartorsiuisarsimasoq, innuttaasunut ataatsimiisitsinissamut atatillugu qaartitsinissamik sakkulersornissamullu siorasaarinerit saqqummiunneqarsimasut pillugit akuersaanngilluinnarpoq.

- Qunusaarinerit aqqutissaanngisaannartussaapput sumiluunniit. Aqqutissaavoq oqaloqatigiinneq, aamma isumaqatiginngikkaluaraanniluunnit, Inuit Ataqatigiinni siulittaasoq, Múte Bourup Egede, partiip Facebookiani allappoq.

Uraani Naamiup siulersuisui aamma taama nalunaaruteqarput:

- Urani Naamik siulersuisuisa Naalakkersuisunik siorasaarisimaneq akuersaarsinnaanngilaa, peqatigiiffimmi siulittaasoq Jan Rehtmar-Petersen Naalakkersuisut tallimanngormat nalunaaruteqareernerisa kingorna qisuariarluni allappoq.

Suliaq avissaartuuffiusoq

Naalakkersuisut sapaatip akunnerata siuliani aalajangerput ulluni 5. - 9. februar tusarniaasoqalerpat peqataassanatik. Greenland Minerals oqartussallu susassaqartut allat peqataassapput.

Naalakkersuisut peqataaniarunnaarnerat IA-mit tupaallaatigineqarpoq. Ilanngullugu IA-p oqaatigaa tusarniaanerup kinguartinnissaanut innuttaasut, kommunalbestyrelse partiillu arlallit kissaateqarnerat, Naalakkersuisunit ataqqineqarsimanngitsoq, taamaattorli atorfilittat kisimik aallartinneqarlutik innuttaasunik ataatsimiisitsisoqalertoq.

- Ajoraluartumik oqartariaqarpunga pisut sakkortusiartornissaannut Naalakkersuisut namminneerlutik tunngavileeqataammata, naalaarsinnaaneq naapeqatiginnikkusussuseqarnerlu pinnagit uteriisertuarnermikkut. Nualluussuup kingunerisaanik katerissinnaanigut killeqarput. Tusarniaanerit naapertuuttumik ingerlanneqarsinnaagatik. Qaavatigullu pilersaarut nalunngilarput qanoq imaannaanngitsigisoq, Múte B. Egede oqarpoq.