IA aamma Siumut umiatsiaararsorlutik aalisartunut iluaqusiiniartut

IA-mit Siumumillu sineriammut qanittumi umiatsiaararsorlutik aalisartut ajornartorsiorneranni ikiorserniarlugit qaleralinnut akitsuutit atorunnaarsikkusunneqarput.

Siumut IA-lu qaleralinnut akitsuummik, Nunatta Karsianut ukiumut 15 millioner koruunit missaannik isertitsissutaasartumik atorunnaarsitsinissamut piareersimapput. Partiit angisuut taakku marluullutik sineriammut qanittumi umiatsiaararsorlutik aalisartut ajornartorsiorneranni ikiorseerusupput.

Siumut sinnerlugu qinigassanngortittut marluk Karl Tobiassen Ilatsiaq Markussenilu tusagassiorfinnut nalunaaruteqarnerminni ilisimatitsipput, saarullinniarneq imminut
akilersinnaajunnaarsimasutut inissisimalersimasoq pillugu aaqqiissutissarsiortoqassasoq.

IA Inatsisartunut qineqqusaarumminik marlunngormat saqqummiussivoq, tassanilu qaleralinnut akitsuutip coronap atuunnerani ikiorsiissutitut peerneqarnissaa anguniarneqarluni.

Royal Greenlandip allaffia nuunneqarli

Siumumit qinigassanngortittut oqaatigaat, Nunatta Karsianut isertitaajunnaartussat ilaatigut Royal Greenlandp allaffissuanik Danmarkimiit Nunatsinnut nuussinikkut matussuserneqarsinnaasut, ”akileraarutitigut nunatsinnut, kommuninut inuiaqatigiinnullu suli annerusumik isertitsissutaalertussaammata”, taakku oqarput.

Grønlandsbankenip qanittukkut inuiaqatigiit aningaasaqarnerannik naliliinermini oqaatigaa, sineriammut qanittumi aalisarneq ajalasooriartortoq, tassa umiatsiaararsorlutik aalisartut amerlavallaarnerat aalisapiluttoqarneralu pissutigalugit, tamannalu piujuartitsinissamik tunngaveqarnermut akerliulluni.

- Pisassiissutit assersuutigalugu qaleralittassiissutit saarullittassiissutillu ukiut arlalllit ingerlaneranni biologit siunnersuutigisartagaannit qaffasinnerusartillugit tamanna aningaasaqarnikkut uumassuseqarnikkullu attanneqarsinnaanngilaq. Uumassusillit ajalasoorsinnaanerisa saniatigut pingaaruteqarpoq eqqarsaatigissallugu, nungusaataanngitsumik aalisartoqarnera Kalaallit Nunaata nunanik allanik niueqateqarnerani takuneqarsinnaanissaa, aningaaserivimmit erseqqissaassutigineqarpoq, tassungalu atatillugu innersuussutigalugu nunarsuarmi sumiiffinni assigiinngitsuni atuisut aalisakkat qaleruallillu MSC-mik meqqilerneqarsimanissaannik piumasaqaatiartut.

Ikiorsiissuteqarnissamut mianersoqqusisut

Aningaaserivimmit aamma innersuussutigineqarpoq Aningaasaqarnermut Siunnersuisoqatigiit coronap ajornartorsiortitsinerata maannamut ingerlasimanera eqqarsaatigalugu, aalisarnermik inuussutissarsiuteqartunut ikiorsiissuteqarnissap siunertamut naapertuutinnginneranik naliliisimanerat.

- Aalisakkat piumaneqarnerat allanngorsimavoq, tamatumalu malitsigisaanik akit nikerarsimallutik, tamannali ikiorsiissuteqarnissamut imminermini tunngaviliinngilaq, aningaaserivi Kalaallit Nunaata aningaasaqarnera pillugu Aningaasaqarnermut Siunnersuisoqatigiit nalunaaruisaat 2020-mi ukiakkut saqqummiunneqartoq innersuussutigalugu allappoq.

IA-kkormiut Siumukkormiulluunniit qaleralinnut akitsuutinik atorunnaarsitsinissamik nalunaaruteqarnermut atatillugu aaqqissuussap ajornartorsiortitsilersinnaaneranut isumminngillat.

Powered by Labrador CMS