IA aamma D: Ineriartortoqarpat angerlartut amerlatsissapput
Kalaallit Nunaanni innuttaasut amerliartoqqissappata ineriartortoqartariaqartoq Inuit Ataqatigiit aamma Demokraatit isumaqarput
Nunatsinni innuttaasut ikiliartorput. Kalaallit Danmarkimi ilinniareernermi angerlaqqittannginnerat ilaatigut peqqutaavoq. Kalaallit Danmarkimi ilinniareernermi angerlartut oqariartuutigaat Nunatsinnut uterneq arlalitsigut unamminartoqartartoq. Meeqqeriviit, inissiat napparsimaveqarnerlu pitsaanerulertariaqartut oqariartuutigisarpaat.
Aningaasaqarneq pitsaanerulerpat angerlartut angerlakaasartut amerlanerulissasut Demokraatinit Randi Vestergaard Evaldsen isumaqarpoq.
Ineriartortoqarnissaa pingaaruteqarpoq
- Aningaasaqarneq pitsaanerulerpat unammillernartut iliuuseqarfigineqarsinnaanngussapput. Tamannalu Demokraatinit anguniarparput, aningaasaqarneq pitsaanerulertariaqarpoq. Inuit sulisinnaasut sulilertariaqarput, uninngatiinnarneqassanngilat. Mittarfiit tungaatigut ineriartortitsisoqartariaqarpoq, tamanna aningaasanik isaatitsinermik kinguneqarluarsinnaavoq. Inuussutissarsiornerup tungaatigut aamma iliuuseqartoqartariaqarpoq, tassunga aningaasaliinermi ineriartortitsisoqassaaq suliffissanik pilersitsisuusussamik, Randi V. Evaldsen oqarpoq.
Aningaasaqarnerup ineriartornera ilutigalugu angerlartut amerlatsissasut Múte Bourup Egede (IA) oqarpoq.
- Siunissap pitsaasuunera takorloorneqartariaqarpoq. Inuussutissarsiutit pitsaanerusumik atugassaqartinneqartariaqarput, taakku ineriartornermut tunngaviusussaapput. Tassuunakkut inuttut aningaasaqarnikkullu ineriartorfiussaaq. Taamaasilluni inuiaqatigiit nukittunerulissapput, akisussaassuseqalernerussaagut kiisalu akisussaaqataarusuttut aamma utertalissallutik, IA-mi siulittaasoq Sermitsiaq.AG-mut oqarpoq.
Oqallinneq pitsaanerusariaqartoq Randi Vestergaard Evaldsen isumaqarpoq. Ineriartornermi pitsaasut isiginiarneqarnerusariaqartut isumaqarpoq.
- Inuiaqatigiit unammillernartitaat oqallinnerni sammineqarpallaartarput. Tamanna Danmarkimi najugaqartunut akuuffigissallugu kajuminnarunnaartarpoq, tamanna mumisinneqartariaqarpoq, Randi V. Evaldsen allappoq.
Politikkikkut sapiissuseqarnissaq
Taamaattoq ineriartorfiusinnaasut taakkartorneqartut Randi Vestergaard Evaldsenimit isumaqatigineqarput.
- Meeqqeriveqarnikkut, ineqarnikkut napparsimaveqarnerullu tungaatigut unamminartut iluarsiivigineqartariaqartut isumaqataavunga. Danmarkimit angerlartussat pillugit tamakku iluarsineqassanngillat, kisianni aamma uagut maani najugaqartuusugut pilluta iluarsiivigineqartariaqarput. Taamaattumik aaqqissuusseqqinnerit politikkikkut ingerlanneqartariaqarput. Politikerinik sapiitsunik politikkereqartoqartariaqarpoq aaqqissuusseqqittoqassappat, maannali politikkeriusut sapiissuseqanngippallaarput, Randi Vestergaard Evaldsen isumaqarpoq.
Oqallisigineqartoq pillugu Kim Kielsen oqaaseqartinniarlugu Sermitsiaq.AG sulissuteqaraluarpoq, iluatsinngitsumik.